٧ مطاعم خرج موعد غرامي بالبترون!

عبالكن تروحوا ضهرة رومانسية مع حبيبكن على رواق، كمشوا إيد حبيبكن وتوجهوا على مطعم مهضوم بشوارع البترون وقضوا ليلة حلوة مع أكتر حدا قريب على قلبكن وعملوا ذكريات ما بتنتسى.

١. À La Pièr

هيدا المحل عبارة عن مطعم مميز عندو قعدة على البحر دغري وقعدة جوانية مع ديكور ساحر من عالم الأحلام، اللقمة عندن ولا أطيب من هيك، بتطلعوا بعيون حبيبكن وبتعيشوا لحظات استثنائية.

الرقم: 535 383 81

٢. أوهانس

مطعم أرمني ولبناني عندو قعدة حجر والجلسة برا على التراس بتفتح القلب. بتقعدوا على رواق بتدردشوا مع حبيبكن وبتاكلوا أطيب لقمة وبتتفرجوا على شوق البترون الأثري.

الرقم: 555 899 76

٣. Appetito Trattoria

مطعم حجر قاعد بقلب قرية المغترب، بقدملكن خبز مع قطعة زيتون أول شي وبترجعوا بتطلبوا الطبق الإيطالي يلي بيجي عبالكن من باستا وبيتزا ولازانيا وغيرن كتير من الأصناف الطليانية عدا عن الحلو المميز. القعدة رومانسية على طاولات الخشب مع شراشف بيض وحمر، بتشبه مطاعم ميلانو .

الرقم: 176 116 03

٤. بيسترو

هالمطعم قاعد على البحر وعندو فيو حلو ومن جوا القعدة في حجر ومريحة كتير، أطباق بحرية ومازة لبنانية ناطرتكن، جو كتير رومانسي لتستأنسوا بالأكل الطيب وتتعرفوا على بعض بزاويتكن الخاصة.

الرقم: 151 222 70

٥. رايز

إذا تنيناتكن بتحبوا قعدة البحر، هيدا الكافيه والمطعم قاعد دغري ع البحر وعندو سفرة ما بتخلي أحاديثكن تخلص وحتى فيكن تجوا على الترويقة، وبس تخلصوا أكل تتمشوا حد البحر وتاخدوا أجمل صور سوا.

الرقم: 703 919 03

٦. Mediterraneo

مطعم بقدم أكل من البحر المتوسط مع قعدة رومانسية وكاس نبيد. عندو جلسة على التراس مع كراسي وطاولات خشب وشراشف بيض لتحسوا بالجو الرومانسي والرايق مع الحبيب ع المزبوط.

الرقم: 208 118 03

٧. Mariolino

هيدا المطعم من أجمل وأطيب المطاعم الإيطالية بالمنطقة، قعدتو كتير رواق ومرتبة ومهضومة وأكلو بشهي. بتقعدوا سوا وبتتأملوا ببعض وبتحكوا كل شي عبالكن تحوا إنتو وعم تستمتعوا بالأكل الطيب والمشروبات. أكيد لازم تتركوا محل ببطنكن للحلو بعد الأكل.

الرقم: 036 888 76

شوفوا كمان، ٧ محلات خرج ترويقة بجبيل.