مهرجانات آخر الصيفية هالويك-أند بلبنان (الدخول مجاني)

شو أحلى من مهرجانات آخر الصيفية لتكون عطلة الويك-اند مميزة مع العيلة أو الأصحاب؟ إذا عبالكن تعيشوا أجواء حلوة، وتكتشفوا نشاطات بتلمّ العيلة والأصحاب وتكون ببلاش، جمعنا لكن أهم المهرجانات اللي عم تصير هالويك-اند بلبنان. خلينا نتعرف عليها سوا!

^{Credits: Lebanon in a Picture}

١. مهرجان بسكنتا

مهرجان بسكنتا واحد من أجمل التجارب الريفية هالصيفية. المفاجأة الكبيرة؟ الفنان زياد برجي رح يحيي حفلة رائعة نهار السبت الساعة 9:30 المسا، رح تسمعوا أغانيه اللي بترددوها دايمًا، وأكيد الحفلة رح تولع الدني. المهرجان مستمر لنهار الأحد مع سهرات غنائية، ألعاب ونشاطات للأطفال، وسوق للأكل والمونة، بالإضافة للأشغال اليدوية اللي بتذكركن بأصالة الضيعة اللبنانية. هون فيكن تاخدوا تكزدروا وتتمشوا بالضيعة، وتشتروا منتجات محلية بأجواء ولعانة للعيلة كلها.

وين: ساحة دير مار يوسف
أيمتى: من 6 أيلول ل 8 أيلول
أي ساعة: من الساعة 5 بعد الضهر للساعة 12 بالليل
الدخولية: مجانية

تنظيم: Street Festival
الرقم: 420 004 81

٢. مهرجان الحازمية

مهرجان الحازمية بيجمع بين أجواء عائلية مميزة ونشاطات ترفيهية بتبسط الكبار والزغار. السبت الساعة 7 المسا، فرقة كازادو رح تقدملكن عرض ممتع للولاد وكمان رح يكون في حفلة للفنان مارك سلوم نهار السبت الساعة 9 المسا. المهرجان مليان ألعاب وعروض بتخلي الولاد ينبسطوا ويلعبوا ويتسلوا قبل ما تبلش المدرسة. ولازم تجربوا الأكل اللبناني اللذيذ يلي موجود بالكيوسكات اللي رح تشوفوها. انبسطوا بتجربة فريدة بتجمع بين الموسيقى والأكل الطيب على وقع أنغام عالمية ولبنانية بنص الحازمية.

وين: الطريق العام حد البان دور
أيمتى: من 6 أيلول ل 8 أيلول
أيا ساعة: من الساعة 5 بعد الضهر للساعة 12 بالليل
الدخولية: مجانية

تنظيم: Street Festival
الرقم: 420 004 81

شوفوا كمان، رحيل مخرج الزمن الجميل إيلي سعادة، هول أبرز أعمالو.