ضيعة من الجنوب: تعرّفوا على رب ثلاثين الحدودية

رب ثلاثين ضيعة لبنانية منسية نوعاً ما، بتتمركز بقضاء مرجعيون بمحافظة النبطية، وبتعتبر من الضيع الحدودية يلي بتعكس تاريخ وحكايات بتشدكن من أول ما توصلولها. من الشمال بتحدها الطيبة، من الجنوب مركبا، من الشرق العديسة، ومن الغرب القنطرة وبني حيان.

رب ثلاثين مش بس طبيعتها بتسحركن، تاريخها كمان بيخليكن تفكروا بقديش الحياة مرقت عليها. هالضيعة شهدت حقبات غامضة وكانت محطة للعابرين. فيها قبور قديمة مثل “قبر الزطية” و”جل النور”، وبيأكدوا كبار الضيعة إنو هالقبور بتعود لناس كانوا يمرقوا لفترة قصيرة قبل ما يكملوا طريقهم.

^{Credits: jabal amel blogspot}

من الآثار اللي بعدها باقية، في مغارات ومدافن وآثار رومانية وكنعانية، وأحلى شي إنو معاصر الزيتون والمغارات اللي بعدها موجودة بتنتمي لفترات كتير قديمة. الضيعة عاشت حكايات وقصص يمكن يرجع تاريخها لأكتر من 250 سنة.

من وين جاي الاسم؟ بالنسبة لاسم “رب ثلاثين”، في أكتر من تفسير لإلو. بعض الناس بتقول إنه كان في تلاتين ضيعة حواليها، وكانت رب ثلاثين هيي المركز اللي بيجمعهن. في تفسير تاني بيحكي إنو الضيعة كانت مركز لتربية تلاتين يتيم، أما التفسير الأغرب فهو إنو أصل الإسم يمني، متل ما منشوف بأسماء كتير من ضيع جبل عامل. وإذا منرجع للمؤرخ أنيس فريحة، فهو سماها “سيدة القوم”، إشارة لأهميتها التاريخية.

حياة أهل الضيعة الناس برب ثلاثين بسيطة وعندها تعلق بالأرض، بتحسوا حالكن رجعتوا لزمن لما كان الجار يسأل عن الجار. البيوت القديمة بعدا شاهدت على هالعلاقات العائلية المتينة، حيث كانت كل بيوت الضيعة متلاصقة ببعضها، وكأنها بيت واحد كبير. السقف تقريبًا واحد، والغرف تتلاصق حتى ما في مجال تفرق بين عيلة والتانية. المحصول كان يتخزن بالكواير اللي كانت بالبيوت، وهالممرات اللي بين البيوت كانت تستخدم للتحرك بسرعة إذا صار أي خطر على ولاد الضيعة

^{Credits: Jabal Amel News}

واقع الضيعة اليوم مع الأسف، رب ثلاثين متل كتير من الضيع الحدودية، تأثرت بالوضع الأمني والصراع الدائر. تعرضت مؤخرًا للقصف، واللي تسبب بدمار لبعض المناطق. بس رغم كل شي، أهلها بعدن متمسكين فيها، ومنتمنى ترجع الحياة لهالضيعة ويرجعوا أهلها، وترجع الضحكات تعمر حيطانها، ويرجعوا المغتربين يزينوها بحضورهن وحنينن.

رب ثلاثين مش ضيعة عادية، هيي مكان بيروي حكايات عن أجيال مرقت وتركت بصمة، وضلت صامدة بوجه كل شي مرق عليها.

شوفوا كمان، صور بتاخد العقل من مدينة الشمس بعلبك.