عيشوا جو الضيعة وخبزوا الصاج… كلّو مع ريما برملية!

عبالكن تقضوا نهار بالضيعة؟ يومكن رح يكون مليان سعادة عند صاج ريما بضيعة رملية، عاليه! خلال هالزيارة الحلوة، رح تنغمسوا بجو ريفي بسيط بياخد العقل، من أول لحظة بتوصلوا فيها ولآخر لقمة صاج بتدوقوها.

أول ما توصلوا، بتستقبلكن ريما بقلب بيتها بكل محبة، ومن هون بيبلش السحر… نهاركن بيبدأ بجلسة طبخ لايف بين الخضار والهوا العليل، وبتحضّروا الصاج بإيديكن جنب ريما، وبتتعلموا من خبرتها الطويلة. تجربة قريبة ع القلب، بتحسّوا فيها كأنكن ببيتكن، بين أهل وناس طيبين.

الترويقة عند صاج ريما بتكون تحت الصنوبر، ع طاولة عامرة بكل شي طيب وطازة: مناقيش عالصاج، لبنة، زعتر، خضرة، وزيت زيتون من الحاكورة. وبعدها، بتعيشوا نهار بسيط بس ما بينتسى: بتقعدوا تحت الشجر، بتتمشّوا شوي حوالين الضيعة، أو بتروحوا هايك خفيف بالجبل.

وبين لقمة الصاج و هالمشوار الحلو، فيكن تتسوّقوا شوي من دكانة زغيرة عند ريما، فيها مونة بيتوتية معمولة بكل محبة، من مربّى ومكدوس لدبس وزعتر وغيرو. حتى فيكن تشتروا مناقيش صاج مجمدة وتخبزوها بالبيت!

ريما من الوجوه المحبوبة بسوق الطيب، وبتلاقوا مناقيشها كل سبت! بلشت تخبز من عمر ٧ سنين، تعلّمت الطريقة من ستّها وقت الحرب، وهلق عم تشاركها مع الناس. 

خطوة خطوة، وصلت ريما لقلوب الناس، ومن خلال  مشروع “أهلاً“، فتحت بواب جديدة، كبّرت المطعم ببيتها وخلقت مساحة كلها حب وجمال وضيافة برملية! 🧺🌿

حابّين تعيشوا هالتجربة؟ فيكن تحجزوا عبر الرقم: 310 061 81. 

ما تنسوا تابعوا صاج ريما ع انستغرام هون. خبرونا، بتحبوا هيك جواهر محلية بترجعكن ع أيام زمان؟

شوفوا كمان، من زمان الناس بتحبّها: ٧ مطاعم محلية بقلب بيروت!