بعد 29 سنة، فندق سان جورج يفتح أبوابه من جديد!

بعد حوالي تلاتين سنة، فتح فندق سان جورج الشهير ببيروت أبوابه من جديد، ورجع ياخد محلّو كرمز من رموز الفخامة بالمدينة. بـ25 أيار 2025، استقبل هالمعلم التاريخي ضيوفه، وعرّفن مش بس ع صالاتو الفاخرة، بس كمان ع “The View”،المبنى الجديد يلي مقابل المبنى الأصلي بعين المريسة.

من وقت افتتاحه الكبير بسنة 1934، فندق سان جورج صار متل رمز لعصر بيروت الذهبي. صممه الفرنسي العبقري أوجست بيريه مع المعماري اللبناني أنطون ثابت، وصار بسرعة وجهة مهمة لكل المشاهير بالعالم. ضيوفه كانوا من الطبقة المرموقة بالقرن العشرين، من إليزابيث تايلور، لبريجيت باردو، وصولاً لشاه إيران،كلّن عاشوا سحره ورفاهيته.

^{فندق سانت جورج في الخمسينات| المصدر: بيروت توداي}

تم تسكيرو من 1975…

مع اندلاع الحرب الأهلية اللبنانية ب 1975، طفت أضوية فندق سان جورج. تعرّض الفندق لأضرار كبيرة خلال حرب الفنادق المشهورة، وواجهته تشوهت من ورا الحرب. ولسنين طويلة، بقي واقف بصمت، أول شي بظل الحرب، وبعدها تحت السيطرة العسكرية السورية.

وتعرقلت محاولات إعادة التأهيل!

كل المحاولات لإعادة تأهيل سان جورج كانت معلّقة بسبب النزاعات القانونية، وخصوصي مع شركة سوليدير يلي كانت ماسكة إعادة إعمار وسط بيروت. مشاريع متل زيتونة باي وغيرها ع الكورنيش حاصرت الفندق، وخلقت نزاعات كبيرة على حقوق الأرض والوصول للبحر، واستمرّت هالمعركة لسنين.

^{المصدر: Beirut Today}

ورجعت الضربة الكبيرة بـ2005

لما تم اغتيال رئيس الحكومة السابق رفيق الحريري بانفجار ضخم قريب كتير من الفندق، رجع سان جورج تلقّى نكسة جديدة… ضرر مادي ووجع معنوي كبير. من وقتها، توقّفت كل خطط الترميم من جديد، وصار وكأنو الفندق محكوم عليه إنو يضلّ شبح من أيام الماضي.

أخيراً، فصل جديد

بسنة 2020، وبعد سنين طويلة من العراقيل والأوراق القانونية، أخد فندق سان جورج أخيراً الضو الأخضر ليبلّش إعداة الترميم والتأهيل. ورغم إنو الفندق الأساسي بقي مسكّر، النادي البحري الخاص فيه والمسبح الشهير يلي بيغمره الشمس، ضلّوا يستقبلوا الزوار كل صيف، وكأنو الروح بعدها عايشة بالمكان.

واليوم، أبوابه مفتوحة من جديد، بيرجع سان جورج يكتب فصل جديد من تاريخه… مطرح بيلتقي فيه المجد، والفخامة، وسحر الزمن الجميل ع شط البحر المتوسط.

شوفوا كمان، أشهر سوق ومطعم إيطالي بالعالم جاية ع أسواق بيروت