من الجريء للجدلي.…حملات إعلانية عملت ضجة واسعة هالصيف!

الصيف بلبنان كان مليان أفكار جريئة، صور ملونة، وإعلانات يا إما نجحت أو فشلت. هيدي نظرة على حملات إعلانية اللي ميّزت الموسم، منها يلي حبيناها ومنها يلي ما حبيناها.

1. WE DESERVE SUMMER مع Roadster

هالحملة ضيّعت كتير ناس مع إنها واضحة! “WE DESERVE SUMMER” إجت مختلفة وغير تقليدية، وسط موجة إعلانات معقدة وجدلية ما قدرت توصل للناس.

الفكرة كانت بسيطة: اللبنانية بيستاهلوا يعيشوا صيف مميز، ورودستر حب يكون حاضر بكل ذكرياتكن بهالموسم. جوعانين بعد البحر؟ طالعين بموعد صيفي ع الخفيف؟ عبالكن لقمة طيبة مع العيلة؟ رودستر دايمًا حدكن.

الحملة جمعت وجوه لبنانية محبوبة متل وائل عرقجي ويارا بو منصف، ومعها منيو صيفي جديد، ديكور ملون، ولباس الموظفين متجدد وبيعكس طاقة وحيوية الصيف. هالتحول ما كان بس شعار وكم إعلان، كان عنجد تجربة صيفية كاملة.

حتى ختموا حملة الصيف بأغنية اسمها WDS من الفنانين jade وOVRSTP وYam، فيكن تسمعوها هون:

كتار مدحوا الحملة على صورها الجريئة وجاذبيتها النوستالجية. أما ناس تانية انتقدوا تركيزها على جو الصيف أكتر من الأكل، وحسّوا إنو وجود المشاهير ما كان إلو علاقة واضحة بالبراند.

حبيتوها أو لا، حملة Roadster خلّت الكل يحكي وأثبتت إنو الحملات مش لازم تكون معقدة لتلفت الانتباه، وأهم شي إنو ذكرتنا بفرحة الصيف بلبنان!

2. المنافسة بين العبدالله والحيالا

كيف بلشت؟ مطعم العبدالله بلش دعاية مهضومة: “العبدالله ✅ الحيالا ❌”. بعد شهر بس، فتح مطعم جديد للفروج تحت اسم “الحيالا”، ومن وقتها ضجّت السوشيال ميديا بالموضوع.

الخبرية إنو مطعم الحيالا فتح بخلدة محل ما كان فرع أحمد العبدالله القديم، وصار المحل الجديد حديث الناس وجذب كتار حبّوا يجربوه. كتير توقعوا إنو أحمد العبدالله نفسه هو اللي فتح المحل وعم يستغل الحملة الإعلامية. ولتكمّل القصة، آخر أربع أرقام من رقم تليفون الحيالا نفسها أرقام العبدالله.

وهالشي خلّى الكل يتساءل: هل المنافس ذكي ولا مطعم العبدالله عم يلعب ع الجهتين؟

3. Spinneys ولوحات “MISSING”

بأول آب، واجهت Spinneys انتقادات واسعة بسبب حملتها اللي عرضت لوحات إعلانية فيها صور ناس مع كلمة ‘مفقود’ مكتوبة بخط عريض، مع اسم المنطقة.

هالتوقيت صادف الذكرى الخامسة لانفجار مرفأ بيروت، وخلى كتير ناس يفكروا إنو هاللوحات تذكير بالضحايا أو إعلانات عن أشخاص مفقودين عنجد.

بس طلع إنها مجرد حملة تسويقية لترويج فروع Spinneys، وواجهت انتقادات بسبب قلة الوعي.

4. Beirut Beer ضد Almaza

ألمازا روزيه هو ابتكار جديد من معمل بيرة Almaza الشهير. تم طرح هالمشروب مع بداية الصيف، وهو بيمزج طعم البيرة مع نكهات الفواكه، وبيقدم خيار منعش بعيد عن البيرة التقليدية.

بعد ما صارت ألمازا حديث الناس، ردت بيروت بير بحملة إعلانية: “بدل ما نلوّنها زهر، تركنا البيرة أصلية!”

صراحة، منحب نشوف هالنوع من المعارك الإعلانية، خاصةً لما تكون ذكية. طريقة ممتعة للبراندات لتتنافس وتشد الانتباه، وكمان بتضيف شوية حماس.

مين بيتذكر حرب حملات إعلانية بين الحلاب، الدويهي، وسي سويت؟

5. إعلانات مطعم Deek Duke مع المؤثرين

حملة Deek Duke الأخيرة كانت فعلاً ذكية. استغلّوا العبارات المشهورة عند الانفلونسرز اللبنانيين وحوّلوها لشعارات جذابة بتشد الإنتباه.

مش بس واكبوا الترند الحالي، كمان بيّنوا قدرتهن على التواصل مع الجمهور بحملة خفيفة ومهضومة. نجاح الحملة واضح من الشهرة اللي حازت عليها والضجة اللي عملتها على مختلف المنصات الإجتماعية.

باستغلال قوة المحتوى الضارب ومواكبة نبض الثقافة الشعبية اللبنانية، ديك ديوك اثبت إنو فاهم جمهوره وبيتواصل معن بطريقة حقيقية ومؤثرة.