من عرش الجمال للشاشة… ياسمينا زيتون بطلة رمضان الجايي!

موسم رمضان 2026 رح يكون حافل بالمفاجآت، خاصةً مع دخول ملكة جمال لبنان 2022 ياسمينا زيتون ووصيفتها الأولى مايا أبو الحسن عالم التمثيل لأول مرة!

الصحافي إيلي مرعب أعلن عبر منصّة “إكس” إنّو ياسمينا زيتون ومايا رح يشاركوا بأعمال دراميّة رمضانيّة ضخمة. كل وحدة بخطّ مختلف عن التانية، بس الاتنين عم يخطوا أول خطوة جدّية بالتمثيل. 

ياسمينا زيتون، يلي الكلّ ناطر يشوفها بعد تتويجها بلقب ملكة جمال لبنان 2022، عم تحضّر لتجربتها التمثيلية الأولى مع شركة الصباح إخوان، بعمل جديد بعنوان “بـ5 أرواح”. المسلسل من إخراج رامي حنا، ورح ينعرض خلال رمضان 2026 على شاشة MBC. 

واللي زاد الحماس إنّها رح توقف حدّ النجمين قصي خولي وكاريس بشار، يعني تجربة قوية رح تفتحلها باب كبير بالدراما. ورغم إنّها بعدها متكتّمة عن التفاصيل، بس في تسريبات كتير. ومنها بتقول إنّها رح تكون من البطلات الأساسيّات، وهيدا الشي زاد فضول الجمهور يلي متشوق يعرف الدور يلي رح تلعبه.

من جهة تانية، مايا أبو الحسن كمان داخلة بقوّة، وعم تنضم لمسلسل “بالحرام” جنب الممثلة ماغي بو غصن من إنتاج Eagle Films، لتثبت إنّها كمان موهبة تمثيلية عم تفرض حالها على الساحة الفنية. فيكن تعرفوا تفاصيل أكتر عن مشاركة مايا برمضان 2026 بمقالنا هون. 

الاهتمام كبير حول العملين، خصوصاً إنّ الجمهور اللبناني والعربي متشوق يشوف كيف رح يبرعوا نجمتين من عالم الجمال قدام الكاميرا.

فهل رح يقدروا ياسمينا زيتون ومايا يثبتوا حالن كممثلات فعليات خلال رمضان؟ الأكيد إنّ رمضان 2026 رح يحمل مزيج حلو بين الجمال، الموهبة، والتجارب الجديدة، والكلّ ناطر يشوف النتيجة على الشاشة.

شوفوا كمان:

الوصيفة الأولى سارة بو جودة تمثّل لبنان بملكة جمال الكون 2025