عرس بقلب مغارة جعيتا عمل بلبلة واسعة… شو القصة؟

عرس بلبنان عمل ضجة واسعة بعد ما انتشرت فيديوهات بتفرجي الاحتفال كان بقلب مغارة جعيتا، وحدة من أهم المعالم الطبيعية بلبنان.

كتير ناس عبّروا عن غضبن وقلقلن من الضرر اللي ممكن يصيب تشكيلات المغارة الحسّاسة، يلي أخدت ملايين السنين لتتكوّن. الحادثة فتحت نقاش عن تراخي لبنان بتطبيق قوانين حماية التراث وسوء استخدام المواقع الطبيعية العامة.

تعليقات الناس ع عرس مغارة جعيتا:

اللبنانيين لجأوا لوسائل التواصل الاجتماعي ليعبّروا عن قلقن. وسألوا كيف ممكن ينعطى إذن لعرس يصير جوّا معلم طبيعي هلقد حسّاس.
وكتير طالبوا وزارة السياحة والجهات المسؤولة يوضّحوا شو صار.

هيدي بعض التعليقات عالـ X (المعروف سابقاً بتويتر):

رد وزارة السياحة

بمقابلة مع Megaphone News، قال عماد صفير، عضو ببلدية جعيتا ومدير فريق عمل المغارة، إنو الصوت والإضاءة “كانوا ضمن المعايير المطلوبة، عددن محدود، وتحت إشراف مختصين”. وأضاف إنو الاحتفال ما كان فيه لا أكل ولا شرب، وضل نص ساعة.

بعد الانتقادات الواسعة، أصدرت وزارة السياحة بيان اليوم أكّدت فيه إنو ما عطت أي إذن لإقامة نشاط خاص داخل المغارة.

وضّحت الوزارة إنو في عقد مؤقّت موقّع مع بلدية جعيتا لإدارة وتشغيل الموقع، وإنو أي نشاط لازم يتقيّد بالقوانين والإجراءات الرسمية.
وأضافت إنو البلدية هي الجهة الوحيدة حالياً المخوّلة تدير المغارة، وعم تشتغل ضمن معايير شفّافة ومفتوحة للمناقصات لحدّ ما يتمّ تحديد مستثمر دائم حسب المعايير الدولية.

البلدية ما قدمت أي اقتراح مفصل أو طلب بيوضح طبيعة النشاط. منشان هيك، الوزارة رح ترسل تحذير رسمي لتضمن الالتزام بكل الالتزامات التعاقدية والتراثية والأخلاقية.

ومن المهم نذكر إنو مغارة جعيتا كانت مسكّرة لمدة 8 شهور للصيانة والحفاظ عليها، ورجعت فتحت رسمياً بشهر تموز هالسنة.

شوفوا كمان:

ممنوع السيارات! سوق جونية صار للمشاة بالويك-أند