زيارة البابا لاوون ع لبنان…شو رح يزور ووين تستقبلوه؟

مع اقتراب زيارة البابا لاوون الرابع عشر للبنان، البلد عم يتحضر لاستقبال هالحدث الضخم للمرّة التالتة بتاريخه، وسط بيروت رح يجتمع من جديد ليستقبل الحبر الأعظم، بمشهد بيجمع الكنائس و الجوامع بساحة الشهداء. 

زيارة البابا لاوون الرابع عشر بلشت الخميس، وهي أول رحلة خارج إيطاليا من وقت تولّيه البابوية، ووجهتها تركيا بعدها لبنان… والعين كلّها على بيروت بهيدي اللحظة التاريخية. هون البرنامج الكامل، المحطات الأساسية بزيارتو، التحضيرات، وغيرو. 

البرنامج التفصيلي لزيارة البابا ع لبنان 

(30 تشرين الثاني – 2 كانون الأول 2025)

الشعار: «طوبى لفاعلي السلام»

الأحد 30 تشرين الثاني 2025 – وصول البابا ع بيروت وبداية اللقاءات الرسمية

تركيا – بيروت

3:45 بعد الضهر: وصول البابا لمطار بيروت الدولي واستقبال رسمي.

4:45 بعد الضهر: زيارة رئيس الجمهورية.
5:15 بعد الضهر: لقاء رئيس مجلس النواب.
5:30 بعد الضهر: لقاء رئيس الحكومة.
6:00 المسا: اجتماع مع السلطات، ممثلي المجتمع المدني والسلك الدبلوماسي، مع كلمة للأب الأقدس.

الإثنين 1 كانون الأول 2025 – زيارة الأديرة والمزارات واللقاءات الروحية

عنايا – حريصا – بيروت – بكركي

9:45 الصبح: زيارة دير مار مارون بعنايا والصلاة عند ضريح القديس شربل.

11:20 الصبح: لقاء الأساقفة والكهنة والمكرّسين بمزار سيدة لبنان بحريصا، مع كلمة البابا.

12:30 بعد الضهر: لقاء خاص مع البطاركة الكاثوليك بالسفارة البابوية.

4:00 بعد الضهر: لقاء مسكوني وحواري بين الأديان بساحة الشهداء ببيروت، مع كلمة.
5:45 بعد الضهر: لقاء مع الشباب في بكركي، مع كلمة للأب الأقدس.

الثلاثاء 2 كانون الأول 2025 – الختام والوداع الرسمي

جل الديب – بيروت – روما

8:30 الصبح: زيارة مستشفى الصليب بجل الديب.

9:30 الصبح: وقفة صلاة صامتة بمرفأ بيروت.
10:30 الصبح: القداس الإلهي على واجهة بيروت البحرية، مع عظة الرب الأقدس.
12:45 بعد الضهر: الوداع الرسمي بمطار بيروت الدولي.

1:15 بعد الضهر: مغادرة لبنان ع روما.

أبرز التحضيرات والإجراءات:

اللجنة الرسميّة المنظمة عقدت مؤتمر صحافي بقصر بعبدا – لواء الحرس الجمهوري، وشرحت كل التحضيرات اللوجستية والأمنية والإعلامية المتعلّقة بزيارة البابا ومسارات الموكب خلال الأيام التلاتة. هيدي أبرزها: 

– 21 طلقة مدفعية عند وصول قداسة البابا كتحيّة رسميّة

– الوصول من الساعة 5 الصبح للمشاركة بالقدّاس الكبير ببيروت (أكتر من 120 ألف شخص متوقّع يحضروا القدّاس)

– حمل علم لبنان أو علم الفاتيكان فقط

– المظلات ضرورية إذا كان الطقس شتي

العميد جوزيف مسلم أوضح أنّ اليوم الأول يتضمّن استقبال البابا بالمطار، فالطرقات رح تسكر بس لحظة مرور الموكب ويعاد فتحها مباشرة بعده. 

الإجراءات الأمنية:

– تفتيش مشدّد على كل النقاط المحيطة بقداسة البابا والمداخل المحيطة بمسار الموكب

– إنتشار عناصر أمنية مجهّزة

– منع إدخال أي مواد قابلة للاشتعال

– منع استخدام الدرون بمنطقة تواجد البابا

وسط كل التحضيرات والتدابير، بيروت جاهزة لتستقبل ضيفها العظيم وتعيش أيام مليانة أمل وتلاحم وطني. الزيارة هي رسالة دعم وتضامن مع لبنان، بتنشر المحبة والسلام، وبتذكّرنا بأهمية الوحدة الوطنية، وكمان بتسلّط الضو على معاناة المسيحيين بالمنطقة.