أجمل 20 شجرة ميلاد بلبنان… أي وحدة المفضلة عندكن؟
عيد الميلاد وصل ومعه أجواء السحر والفرح اللي عم تضوي كل لبنان. أكتر من 60 مهرجان وسوق ميلادي انطلقوا هالموسم، وكذا منطقة شهدت فعاليات إضاءة شجرة الميلاد اللي مننتظرها كل سنة. جمعنالكن أجمل اللقطات لـ20 شجرة ميلاد بلبنان، مع صور وفيديوهات من حفلات الإضاءة وإفتتاح المهرجانات. أي شجرة ميلاد كانت المفضلة عندكن هالسنة؟ خلينا نكتشف سوا جمال كل شجرة ونعيش لحظات الفرح بكل منطقة. 🎄✨
1. شجرة الميلاد – البترون
من أجمل وأرقى زينات شجر الميلاد اللي مرقت على لبنان، كأنها طالعة من عالم ديزني. وسنة بعد سنة، البترون عم ترسّخ حالها أكتر وأكتر كعاصمة الميلاد بلبنان، وعم تتحوّل لوجهة عالمية بيقصدها السيّاح بهالموسم المميّز.
وهون فيديو للحظة إضاءة شجرة الميلاد بالبترون:
2. شجرة الميلاد – جبيل
هالسنة شجرة الميلاد بجبيل مش بس زينة… هي قطة فنية معمارية، معمولة بالكامل من مرايا على شكل ورق شجر. تصميم بيرمز للتجدّد وللقوّة اللي منخلقها سوا.
3. شجرة الميلاد – جونية
شجرة الميلاد هالسنة بجونية مستوحاة من ال12 كنيسة والبيوت القديمة المشهورة بالمنطقة!
وهون فيديو للحظة إضاءة شجرة الميلاد بجونية:
4. شجرة الميلاد – وسط بيروت
بعد غياب أكتر من سبع سنين، شجرة الميلاد بوسط بيروت رجعت لتحكي قصة المدينة. هالسنة، تصميم لولو عالشجرة بيعكس بيروت “لؤلؤة الشرق الأوسط”، والشجرة نفسها رمز للقوة، النقاء والسلام، مستوحاة من زيارة البابا لاوون للبنان.
5. شجرة الميلاد – الزيتونة باي
شجرة الميلاد بزيتونة باي تركت بصمتها كأول شجرة دوّارة بلبنان، مستوحاة من تراثنا. ورقها مستلهم من ورق الزيتون، شجرة السلام والصمود والجذور. بالنهار، بتعكس جمال بيروت، وبالليل بتضوي على الميّ وبتنشر الفرح والأمل مع كل برمة.
6. شجرة الميلاد – زغرتا
من بعد ما تعودنا نشوف إضاءة شجرة الميلاد ببحيرة بنشعي، Christmas By the Lake قرروا كمان يضيفوا سحر الميلاد هالسنة على منتزه سليمان فرنجية بزغرتا.
7. شجرة الميلاد – أنفه
من قلب أنفه، انطلقت الاحتفالات مع إضاءة شجرة الميلاد يلي عكست فرع وروح العيد بلبنان.
8. شجرة الميلاد – ABC أشرفية
ABC بالأشرفية أطلق موسم الأعياد باحتفال مميز مع إضاءة شجرة الميلاد تحت شعار “Let There Be Light”، وتمنّوا عيد ميلاد مليان سلام وفرح ومحبة.
9. شجرة الميلاد – Le Mall ضبية
تميّزت زينة شجرة الميلاد بوجود مجسمات ضخمة مستوحاة من أجواء العيد، صمّمت بعناية لتضيف لمسة فنية وجمالية. هالزينة حولت المول لمشهد مليان ألوان وأضواء ولمسات إحتفالية!
10. شجرة الميلاد – سيتي سنتر
فعالية إضاءة شجرة الميلاد بالسيتي سنتر تميّزت بعروض سحرية للولاد وكورال ميلادي مميز أضفى أجواء فرح وبهجة.
11. شجرة الميلاد – كاسكادا مول تعنايل
سحر الميلاد وصل ع تعنايل مع فعالية إضاءة الشجرة بكاسكادا مول يلي تضمنت موسيقى وعروض ساحرة للولاد.
12. شجرة الميلاد – The Village ضبية
متل ما تعودنا كل سنة، ذا فيلدج ضبية عم يضيف فرح لكل زوار بشجرة ميلاد ذهبية ومميزة.
13. شجرة الميلاد – The Backyard حازمية
هالسنة، زوروا هالمحل بالحازمية وخدوا أجمل الصور جنب شجرة الميلاد يلي بيتميزه فيها عطول.
14. شجرة الميلاد – راشيا
القرية الميلادية الأولى بضيعة راشيا في البقاع شهدت فعالية إضاءة شجرة ساحرة.
15. شجرة الميلاد – ضهور الشوير
تمت إضاءة شجرة الميلاد بالساحة العامة بضهور الشوير من بعد كورال وطني جامع بالكنيسة.
16. شجرة الميلاد – عاليه
لأول مرة من 20 سنة، بلدية عاليه افتتحت قرية الميلاد مع فعالية إضاءة الشجرة!
17. شجرة الميلاد – ساحة ساسين الأشرفية
متل كل سنة، تمت إضاءة شجرة الميلاد بساحة ساسين بمشهد معبّر للفرح والعيد بالمدينة!
18. شجرة الميلاد – زوق مكايل
تمت إضاءة شجرة الميلاد خلال مهرجان حافل بزوق مكايل!
19. شجرة الميلاد – صور
تم إفتتاح أول قرية ميلادية بصور يلي رح تضل ل 23 كانون الأول!
20. شجرة الميلاد – شكا
شجرة الميلاد هالسنة تميّزت عن غيرها بالتصميم يلي بيعبر عن فرحة العيد والطفولة!
شو أولكن، نسينا شي منطقة؟ خبرونا بالتعليقات وأكيد اكتبولنا أي شجرة ميلاد حبيتوا أكتر شي هالسنة بلبنان؟
الأكثر قراءة هالشهر
