كنز من 1800 سنة طلع تحت بيت بالبترون…قصة المدرج الروماني!
في قصص ما بتصير إلا بلبنان… متل قصة المدرج الروماني بالبترون، واحد من أندر الاكتشافات الأثرية يلي انكشف بالصدفة، وبقي لهلق معروف بس لأهل المنطقة.
القصة بلّشت لما صاحب بيت بالبترون قرّر يوسّع جنينته وينزّل مستواها شوي، وكمان ليعمل استوديو للتصوير تحت البيت. ومع أول الحفريات، المفاجأة الكبيرة ظهرت، مدرّج روماني محفور بالصخر، مدفون تحت التراب من حوالي 1800 سنة. شي ما بيخطر ع البال، خاصةً بقلب بيت عادي متل أي بيت تاني. احضروا جولة بالموقع هون:
بعدها، إجا عالم آثار من منطقة البترون وبلّش يشتغل عالموقع، وتبيّن إنّو الرومان استخدموا هالمدرّج بين سنة 222 و235 بعد الميلاد. بهديك الفترة، كانت البترون مدينة ساحلية مهمّة بالحضارة الرومانية.
المدرّج شكله نصف دائري، ومقاعده مواجهة لجهة الغرب، وبيكمل امتداده تحت بيوت الجيران. وحتى من الجهة الغربية، في دلائل بتشير إنّو كان في حمّامات رومانية بعدها مدفونة تحت الأرض.
اللافت أكتر إنو الأشغال بالموقع ما اكتملت. ورغم إنو الموقع ملك خاص، صاحب البيت قرّر يخلّي المدرج الروماني بالبترون مفتوح للزوار، وكل مين عندو فضول أو حب للتاريخ فيه يمرق ويشوف هالكنز المخبى. حضروا هون:
المدرّج الروماني بالبترون دليل واضح أديه هالمدينة بعدها مخبّاية أسرار بعدها مش مكتشفة، وكتار بيعتقدوا إنو في آثار أكتر بعد ما التنقيب عنها. تخايلوا بيت عادي وشوية حفريات فتحتلنا شباك على تاريخ عمره آلاف السنين.
خبرونا، كنتوا بتعرفوا عن المدرج الروماني بالبترون؟ واتركولنا بالتعليقات رأيكن بهيدا الإكتشاف!
الأكثر قراءة هالشهر
