محل ببيروت ما بياخد مصاري…وفيكن تتسوقوا كل شي!

بتصدقوا في محل ببيروت ما بياخد مصاري أبداً؟ عنجد ولا ليرة! اسمو Salt and Grain Exchange بالحدث، وكل فكرتو مبنيّة نظام مقايضة أو تبديل. 

إذا عندكن أغراض بالبيت ما بقى بحاجة إلها، بدل ما تكبوها أو تتلبكوا فيها، فيكن تجيبوها لعندن وتتبرعوا فيها. بالمقابل، فيكن تاخدوا من المحل أي شي بيعجبكن وبتحتاجه.

شو بتلاقوا؟ تقريبًا كل شي!

تياب رجالي ونسواني، كنزات مرتّبة، أحذية من كل المقاسات، عفش، أغراض بيت، كتب، الكترونيات، ألعاب، أدوات رياضية وكهربائية، وحتى مستلزمات للأمهات. المحل كبير وفيه أشيا حلوة ونضيفة!

المبادرة شغّالة على نظام نقاط:

كل غرض بتتبرّعوا فيه إلو قيمة معيّنة. في أغراض بتعطي نقطة وحدة، غيرها 5 نقاط، وفي أغراض مميّزة بتعطي 10 نقاط. كل غرض معلّم لون، وكل لون بيقلكن كم نقطة بيطلعلكن ع الغرض. هالنقاط هي “ميزانيتكن” لتتسوقوا بالمحل. كل شي واضح بالألوان، وفي إشارات بكل مكان لتسهّل الاختيار.

كيف الخبرية؟

بتجيبوا أغراضكن، بتسلّموها عالكونتر، المتطوّعين بيعملوا نظرة سريعة وبيحسبولكن النقاط. بالوقت يلي هني عم يحسبوا، فيكن تاخدوا فنجان قهوة وتبرموا بالمحل. وقت تعرفوا ميزانيتكن، بتختاروا الأغراض اللي بحاجة إلها، وبالآخر تصير المقايضة الأخيرة… وهيك بتكون خلصت عملية التسوق.

وكمان في فكرة كتير حلوة: حيط الإحتياجات.

أي شخص محتاج شي، بيعلّق طلبه عالحيط. وإذا إجى حدا عنده هالغرض، بيجيبه ليتبرّع فيه. بسيطة، ذكيّة، وبتحسسكن أديه المجتمع فيه يكون داعم.

محل Salt and Grain Exchange، موجود تحديداً بالحدث حدّ صالون Elie Moussan (اكبسوا هون للموقع بالزبط). بيفتح من الإتنين للجمعة، من 10 الصبح ل 4 بعد الضهر. للتواصل ع الرقم: 761 688 81. ما تنسوا تابعوهن ع انستغرام هون.

شوفوا كمان:

أحلى سوق ببيروت فتح كافيه…السبت عند سوق الطيب صار غير!