تغدّوا مع عيلة لبنانية بالضيعة… مطعم متل بيتكن التاني بالجبل!
بدكن تعيشوا نهار ريفي متل أهل الضيعة؟ لازم تزوروا مطعم “البيت بيتكن” بضيعة العاقورة. هيدا مش بس مطعم… هيدا تجربة كاملة بتفوتوا فيها ع بيت جبلي عمره أكتر من 150 سنة، وبتتغدوا مع عيلة لبنانية عندن حسّ ضيافة ما فيه منو.
الست صفا وعيلتها هني روح المحل. بتستقبل الضيوف بابتسامة دافية وكأنكن من أهل البيت. كل الأكل معمول تحت إيدا، بحب ومن خيرات الأرض. المناقيش عالصاج سخنة وطريّة، والطبخ عالحطب — من الفطاير لليخنات وحتى أغلب الحلويات. بتقعدوا تتغدّوا بقلب بيتها، وتعيشوا أجواء الجبل بكل تفاصيلها.
وعندن مونة بلدية معمولة بالبيت: مربى ع أصولو، حامض الحصرم المشهورين فيه، لبنة وجبنة بلدية، وغيرو كتير من خيرات الموسم.
البيت حجر عتيق، وكنبياتو مزركشين بنقشات قديمة بتحسسكن رجعتوا بالزمن. الديكور تراثي وأصيل، وكل زاوية بتحكي قصة. برا في مزرعة زغيرة وحقلة وجنينة حلوة، والقعدة ع البرندا بتطل ع جبال العاقورة الخيالية… منظر بيريّح القلب وبيخلّيكن تنسوا كل شي.
بالشتوية، القعدة جنب الصوبا مع صوت الحطب وصحن أكل دافي قدامكن… إحساس ما بينوصف.
وبالصيف، القعدة برا إلها طعم تاني: نسمة عليلة، ريحة زهر، وطبيعة ع مدّ النظر.
المكان بيستقبل زوار من كل لبنان، وكتير سياح بيقصدوه بس ليعيشوا هالتجربة الريفية الأصيلة. بس ديروا بالكن، الحجز لازم يكون قبل بـ 3 أيام لأنو البيت دايمًا مليان.
“البيت بيتكن” مش مجرد اسم… هو تجربة. بتفوتوا ضيوف، وبتفلّوا وكأنو صار عندكن بيت تاني بالجبل.
للحجز ع الرقم: 373 853 03. ما تنسوا تابعوهن ع انستغرام هون.
