”مربى الدلال“: وفاة دلال كرم، الزوجة السابقة لزياد الرحباني
وسط أخبار الحرب والدمار، استفاق لبنان اليوم على وداع جديد. دلال كرم، الزوجة السابقة للراحل زياد الرحباني، توفّت بعد صراع دام خمس سنين مع سرطان الرئة. الخبر شاركه الإعلامي والكاتب ريكاردو كرم، يلي أكد إنها رحلت حوالي الساعة 6 صباحاً يوم الخميس 19 آذار 2026.
الخسارة بتوجع أكتر خاصة إنو زياد غاب عنّا من أقل من سنة، بشهر تموز 2025. يلي عاشوا هديك المرحلة من المسرح والموسيقى اللبنانية، اليوم كأنو باب تاني عم يتسكر بهدوء.
دلال كانت جزء من “الفرقة الشعبية اللبنانية”، والتقت بزياد لأول مرة خلال مسرحية “ميس الريم”. ومن هاللقاء، وُلدت قصة حب تُوّجت بزواج سنة 1979، وابن واحد اسمه عاصي (لاحقاً انكشف إنو ما طلع إبنو البيولوجي)، إضافةً لفترة إبداعية تركت بصمة واضحة على الثقافة اللبنانية. زياد كتب بعدها أعمال حملت صدى هالمرحلة، منها الأغنية المعروفة “مربى الدلال”.
زواجهُن إنتهى بسرعة، والسنين اللي بعدها حملت معها كتير حكي إعلامي وضجّة حول تفاصيل شخصية.
دلال كرم بتضل امرأة حاضرة بقلب أهم مراحل الفن اللبناني، بوقت كان المسرح فيه وسيلة أساسية تعبّر فيها بيروت عن حالها. وهيدا بحد ذاتو إلو قيمتو.
الله يرحمها.
الصورة الرئيسية عبر ريكاردو كرم
