أروق قعدة عالبحر…مطعم جديد ع كورنيش صيدا!
ع كورنيش صيدا البحري، في مطعم جديد مرشّح يصير من أحلى أماكن الصيف، اسمو سر الياسمين Ser El Yasmine. من أوّل ما توصل عليه، بتحس إنك دخلت لعالم مختلف: رواق، قعدة مفتوحة، ولمسة بحر حاضرة بكل تفصيل، من الألوان الصيفية للديكور لنسمة الهوا اللي جاية من الموج القريب.
مطعم سر الياسمين مبني بطابع تراثي جميل، قناطر عالية وحجر قديم بيعطيه هيبة، بس بنفس الوقت في لمسة ديكور هادية ومريحة بتخليك تحس بالراحة. القعدة برا عالكورنيش إلها سحر خاص، خاصةً الصبح وقت الشمس بعدها واطية والهوا عليل، أو بالليل لما أضوية المدينة تنعكس عالبحر وتعمل جو رومانسي وهادئ بيشرح القلب.
أما الأكل… فالحكي لوحده ما بكفّي! تجربة لبنانية أصيلة بكل معنى الكلمة. في سلّة ترويقة غنية بتفتح النفس: لبنة مع زيت وزعتر، جَبنة، مكدوس، فول، فتّة ومسبّحة… والغدا أوسع وأغنى، من المشاوي المشكلة والكفتة المشوية، للكبة بأنواعها، وورق العنب، التبولة، الفتوش، والهندبة، وكل شي بطعم بيتي أصيل.
وكمان في أكلات يومية بتتغيّر حسب طبخات لبنانية بيتية، كأنك قاعد عند ستّ البيت وعم تاكل من إيدها. وبآخر التجربة، ما في أحلى من تحلاية الصيف: بوظة مع بقلاوة وفستق، أو حلويات لبنانية خفيفة بتختم الزيارة بأحلى طعم.
المكان بيناسب الصبحيات الهادية، قعدات الرفقات، وحتى غدا الشغل. فيك تقعد عالتراس بين الشجر وعلى واجهة البحر وتشوف صيدا قدّامك. هو من هالأماكن اللي إذا مرقت بصيدا، أكيد رح تقول لازم أرجع عليه مرة تانية.
تابع سر الياسمين ع حسابن ع انستغرام هون. للتواصل ع الرقم: 098 375 79
