رسمياً.. مطار القليعات راجع للخدمة ابتداءً من بكرا!
بـ6 حزيران 2026، رح ينطلق مطار القليعات، المعروف رسميًا بمطار رينيه معوّض، بحفل رسمي بيعلن بداية مرحلة جديدة للطيران المدني بلبنان، ورجعة تاني مطار مدني بالبلد للخدمة بعد عقود من التوقف.
لتعرفوا أكتر عن الشركة اللي ربحت مناقصة تشغيل المطار، اكبسوا هون.
المطار موجود بعكار، على بعد كم كيلومتر من الحدود السورية، وعندو تاريخ طويل. بالبداية بناه الجيش الفرنسي بأواخر الثلاثينات، وبعدها صار يُستخدم لأغراض عسكرية ومدنية. وخلال الحرب الأهلية، لعب دور مهم بربط الشمال بباقي المناطق، خصوصًا بين الـ1988 والـ1990. لما كانت شركة طيران الشرق الأوسط عم تسيّر رحلات داخلية بين القليعات وبيروت.
مشروع إعادة تشغيل المطار ضلّ عالق لسنين طويلة، رغم كل الطروحات والمحاولات اللي انعملت لإحيائه. ومع الحاجة لتخفيف الضغط عن مطار رفيق الحريري الدولي وتطوير قطاع الطيران بالبلد، رجعت الفكرة بقوة على الطاولة.
وبداية هالسنة، الحكومة أعطت الضوء الأخضر لخطة التشغيل التدريجي، ومع انطلاق المناقصات وأشغال التأهيل، صار المشروع أقرب للواقع.
ومن المتوقع إنو تشغيل مطار القليعات ينعكس إيجابًا على منطقة الشمال، من خلال تنشيط السياحة، تحريك العجلة الاقتصادية، وخلق فرص عمل واستثمارات جديدة. كمان رح يشكّل منفذ جوي إضافي للبنان، خصوصًا بفترات الضغط على مطار بيروت.
وبحسب المعنيين، في خطط مستقبلية لاستقطاب شركات الطيران منخفضة الكلفة وتطوير خدمات الشحن الجوي، لحتى يصير للمطار دور أكبر على الصعيد الاقتصادي واللوجستي.
انطلاقة بكرا بتشكّل رجعة مرفق حيوي ضلّ خارج الخدمة لعشرات السنين، وخطوة بتفتح صفحة جديدة بمستقبل الطيران بلبنان.
