أسهل وأجمل 8 دروب مشي حول لبنان!

مش كل ويك-اند لازم يكون مليان مغامرات وهايكينغ بيتعب. أوقات، كل اللي منحتاجه هو شوية هوا نضيف، مناظر بتريح الأعصاب، وتمشاية خفيفة بتخلّينا نرجع مرتاحين ومبسوطين. ولحسن الحظ، لبنان مليان أماكن طبيعية فيك تستمتع فيها من دون ما تضطر تمشي مسافات طويلة أو تطلع طلعات صعبة. إذا كنت حابب تمشي حد النهر أو عم تفتش على درب سهل بمناظر بتجنن، هيدي 8 دروب مشي مريحة للكل كرمال أحلى كزدورة بالطبيعة بلبنان.

1. درب سكة الحديد – بعبدا

درب سكة الحديد بعبدا من أجدد مسارات المشي بلبنان، وبيمرق فوق جزء تمّ ترميمه من سكة الحديد القديمة. بيمتد هالمسار لمسافة 4 كيلومتر، بياخدك بجولة بين غابات الصنوبر وبفرجيك المحطات والمباني التاريخية للقطار. لأنو الطريق جالس وسهل، فهو خيار ممتاز يلي حابب يقضي وقت هادي بالطبيعة.

2. درب المسيلحة

لو كنت عم تدور على مشاهد خلابة من دون تعب، فدرب المسيلحة هو الخيار الأفضل. بيمر هالمسار جنب نهر الجوز وبيوصلك مباشرة لقلعة المسيلحة الشهيرة. أغلب الطريق سهلة، لهيك هي مثالية للي بيفضلوا المشي الهادي، وللعيل، ولكل حدا حابب يعمل كزدورة مريحة.

3. درب نهر الجوز

هالمسار مغطي بفيّ الشجر وبيمتد جنب المي، بيعطيك إحساس إنك عم تتمشى بمنتزه أكتر من إنك عم تعمل هايكينغ. هو مجهز بمقاعد، أماكن للبيكنك، ولوحات إرشادية، فبيعتبر خيار ممتاز للزوار اللي حابين يستمتعوا بالطبيعة براحتهن وياخدوا وقتهن.

4. محمية الأراضي الرطبة عميق – البقاع الغربي

بتوفر محمية عميق الطبيعية بسهل البقاع تجربة مشي من الأسهل بلبنان. دروبها الجالسة بتخلي الزيارة مريحة للكل، والمنطقة المليانة جواميس مي وطيور ومناظر هادية بتقدم مشاهد بتجنن للتمشاية. وإذا كنتوا من محبي مراقبة الطيور، ما تنسوا تجيبوا المنظار.

5. محمية أرز تنورين

مع إنّو في مسارات أطول داخل المحمية، كمان في طرقات أسهل بتخلّيك تستمتع بغابات الأرز من دون مشي صعب. خيار ممتاز إذا بدك تهرب عالغابة وتمشي شوي بين الشجر والفيّ.

6. درب السما

بيشتهر درب السما بمناظره الساحرة وأجوائه العائلية المريحة، وفي مسارات بتناسب كتير المشاوير الطبيعية البسيطة. وع حسب الدرب اللي بتختاره، فيك تعمل جولة سهلة وتستمتع بالإطلالات الخيالية من دون ما تكون محترف.

7. مغارة زحلان

مخبّاية بين الطبيعة الخضرا، مغارة زحلان بتوفّر مشوار لطيف بين أحضان الطبيعة، وبآخره مناظر جميلة بتستحق الزيارة. الطريق بشكل عام سهل، وبيناسب أي حدا بده يغيّر جو من دون تعب.

8. نهر الكلب

نهر الكلب مكان رائع للاستكشاف، بس مش كل المسارات فيه بنفس السهولة. في أقسام مناسبة للمشي الخفيف، وفي أقسام تانية ممكن تكون أصعب شوي وبتحتاج مجهود أكبر.

إذا بتعرف مشاوير طبيعة و دروب مشي سهلة غير حول لبنان، خبرونا!

شوفوا كمان:

أجمل 55 محل تتفرجوا ع غروب الشمس بكل لبنان