هيك فيكن تقضوا نهار حلو ببرج حمود

هالمنطقة الحلوة مخباية مغامرات مهضومة وجديدة، مطاعم، محلات ومعارض وقصص كتير.

يلا دوروا السيارة وصفوها أول ما تلاقوا صفة لأن مش بحاجة إلها.

١. بلشوا نهاركن بأطيب ترويقة عند أبو حسان

محل زغير صرلو أكتر من 40 سنة بقدم أشهى الأطباق

فول، فتة، حمص، وأشهى الصحون فيكن تتخايلوها عند أبو حسان!

الرقم: 888 266 01

٢. انزلوا على السوق واشتروا مجوهرات ودهب

بتلاقوا كل الأسعار من الغالي للرخيص والموديلات لي بتخطر على بالكن

٣. تمشوا بين المحلات وشوارع المنطقة وتفرجوا على الحيطان الملونة

٤. اشتروا فواكة وخضرا من الشارع بأحلى الأسعار

٥. تمونوا بهارات وأعشاب طبيعية ما بتلاقوها غير هون

٦. تمشوا بشارع أراكس وتفرجوا على المحلات

من محلات تياب للمجوهرات والأرتيزانا لمحلات الموسيقى والعطور

كل شي موجود من الجديد للقديم للتراثي ولي على الموضى

رح تلاقوا قطع فريدة ما بتلاقوها بغير محل!

٧. عيشوا تجربة أرمينيا الزغيرة عند Bardez

قطع أرمنية وين ما كان، زينة وألوان وأكل أرمني… بتحسوا حالكن سافرتوا على Yerevan

الرقم: 636 239 71

٨. يمكن يطلع على بالكن معجنات مع بهارات ونكهة حر، إذا هيك لازم تزوروا غزار

الفرن لي عندو معمول على الأصول بالحجر ليحافظ على القمح والمكونات طازة وشهية

عندو عدة أنواع لحمة بعجين: اللحمة بعجين الأرمنية مع بندورة وبصل وبقدونس، لحمة بلبن، لحمة ببطاطا، لحمة بعجين بفطر محل اللحمة، لحمة بسجق، ولحمة مع دبس الرمان

الرقم: 708 242 01

٩. دوقوا الحلو الأرمني ال Tahinov Hats مع فنجان قهوة

بتلاقوا بكل المحلات والأفران وهوي عبارة عن خبز معمول بطحينة مع قرفة وسكر

١٠. زوروا كنيسة مار وارطان الأرمنية الملونة زهر

١١. اشتروا أجمل الإسطوانات القديمة من عند Voice of Stars

١٢. زوروا معرض Badguer مطرح ما رح تحسوا حالكن بغير عالم

عروض فنية وأكل تراثي وحديث مهضوم مع أطيب ناس وكم كلمة أرمنية وموسيقى

عندن أطيب عصير على الإيد وأكل بلدي لذيذ… حلمكن الأرمني حقيقة هون

الرقم: 214 240 01

١٣. معقول تفلوا من دون ما تدوقوا الشاورما عند مانو؟

ميلوا عند أيقونة الشاورما وطلبوا ساندويش المارغيز، شاورما لحمة، شاورما سجق، شاورما دجاج وأكيد ما تنسوا الروستو والباسترما

عبوا الكيس منيح وخدوا معكن للناس لي بتحبوهن قبل ما تفلوا

الرقم: 560 268 01

`

شوفوا كمان، مطعم النهر: لقمة بيت ومي جارية.