سيرك لبنان رجع ع بيروت، وهيدي أسعار التذاكر!

بعد غياب 7 سنين عن بيروت، سيرك لبنان رجع بعرض جديد! شركة السيرك اللبنانية رجعت ع العاصمة مع عرض FUSION، يلي بيجمع بين الألعاب البهلوانية، والعروض الهوائية، والحركات الجريئة، والموسيقى والمؤثرات الخاصة.

انطلق العرض رسمياً بـ 3 تشرين التاني 2026، بخيمة سيرك مقابلة للفوروم دو بيروت، ليكون هيدا أول رجعة للشركة ع بيروت من سنة 2019. وهالرجعة بتضيف نشاط جديد بعالم الترفيه بلبنان، خاصةً للعيل والولاد.

شو ناطرنا بعرض FUSION من سيرك لبنان؟

عرض FUSION مناسب لكل أفراد العيلة، وبيجمع حوالي 55 فنان من مختلف أنحاء العالم. وبيضمّ مجموعة من فنون السيرك، منها الألعاب البهلوانية والعروض الهوائية، بالإضافة للعروض الموسيقية والرقص والحركات الاستعراضية الخطيرة.

العرض بيتقدّم جوا خيمة سيرك بتصميم إيطالي، مع مقاعد موزّعة بشكل دائري، حتى يتمكّن الجمهور يشوف العروض من كل الجهات وبزاوية 360 درجة.

إمتى ووين فيكن تحضروا العرض؟

بلّش عرض FUSION بـ 3 تشرين التاني، ومستمرّ على مدار شهر تشرين التاني، مع عروض إضافية لغاية شهر كانون الأول.

المكان: خيمة السيرك المقابلة لفوروم دو بيروت

تاريخ الانطلاق: 3 تشرين التاني 2026

مدة العروض: لغاية 10 كانون الأول 2026

أديه أسعار تذاكر سيرك لبنان؟

أسعار البطاقات بتختلف بحسب فئة المقاعد والبلوك، وبتبلّش من 25$ وبتوصل لـ 70$. وهيدي الأسعار بالتفصيل:

الذهبي – 70$: البلوكات 2، 3، 4 و5

الفضي – 55$: البلوكات 3 و4

الأحمر – 45$: البلوكات 1، 2، 5 و6

الأزرق – 35$: البلوكات 2، 3، 4 و5

الأخضر – 25$: البلوكات 1 و6

فيكن تشوفوا المواعيد المتاحة، تختاروا مقاعدكن وتحجزوا تذاكر من خلال موقع Ticketing Box Office.

رجعة سيرك لبنان ع بيروت إجت بعد غياب 7 سنين. وخلال هالفترة، كمّلت الشركة عروضها بمختلف أنحاء المنطقة، وقدّمت عروضها لجمهور دول عربية متل السعودية والإمارات والكويت والأردن وقطر. واليوم، مع عرض FUSION، رجعت لتقدّم تجربة السيرك للجمهور اللبناني من جديد. متحمّسين؟

شوفوا كمان:

تصاميم زهير مراد وبأسعار أقرب للكل… مجموعة جديدة مع ALDO!