وين تلاقوا سوق اليقطين الشهير بالبقاع؟

إذا كنتوا رايحين ع البقاع بهالفترة، خلو عينكن عالطرقات… لأنو أكيد رح تلفتكن خيم وبسطات مليانة اليقطين والقرع بكل الأحجام والألوان!

مع بداية موسم اليقطين، بتتحوّل طرقات سهل البقاع لمحطات صغيرة مليانة أكوام اليقطين الطازة، وبتصير هالبسطات من المشاهد الحلوة اللي بتميّز الخريف بالمنطقة. وهون فيكن توقفوا تشتروا من المزارعين مباشرة، أو تاخدوا كم صورة بهالأجواء الخريفية.

وين تلاقوا سوق اليقطين؟

إذا عم تسألوا عن عنوان محدد، ما في سوق مركزي واحد أو محل مسقوف اسمو سوق اليقطين. القصة عبارة عن خيم خشبية وبسطات موسمية بتنتشر ع جوانب الطرقات بين كفريا والخط الدولي بين بيروت ودمشق، وخصوصًا بمنطقة عميق بالبقاع الغربي.

الصورة المرفقة هون لهيدي البسطة من خربة قنفار.

ومن البسطات اللي صارت معروفة عند الزوار، في «ع طريقك عانا» بضيعة عانا – الطريق العام، البقاع الغربي، وين بتلاقوا أكوام كبيرة من اليقطين الطازة، بأحجام وألوان وأنواع مختلفة.

 الرقم للتواصل: 876 726 03

موسم اليقطين بلبنان

موسم اليقطين بيبلّش بأواخر الصيف وبيكمل خلال الخريف، وخصوصًا بين أيلول وتشرين الأول، وبيضل موجود لحد نص تشرين التاني تقريبًا. يعني هالفترة هي من أفضل الأوقات إذا بدكن تشتروا يقطين طازة للمونة أو للطبخ.

ومن الأنواع المشهورة بالبقاع اليقطين الأبيض والأحمر. الأبيض معروف بحجمه الكبير، وممكن توصل حبته لأكتر من 60 كيلو، وبيكون خيار مطلوب عند التجار. أما الأحمر، فحجمه أصغر، وعادةً بيكون بين 7 و10 كيلو، وطعمته أغنى، وبيعتبر خيار حلو للبيت والطبخ والشوي.

ومن اليقطين فيكن تحضّروا أكلات كتيرة، من كبة اليقطين والشوربة للمربيات وحلو الجزريّة الشهير بلبنان.

وطبعًا، القصة مش بس أكل! أكوام اليقطين الملوّنة عالطرقات صارت من أجمل مشاهد الخريف بالبقاع، وبتخلّي أي مشوار بالمنطقة أحلى… فالمرة الجايي اللي تكونوا مارقين من هونيك، خلو عينكن ع البسطات!

شوفوا كمان:

15 مطرح بقلب بيوت تراثية ببيروت