مهرجان الإستقلال الحمرا شو مشاريعنا

ما تفوتوا مهرجان الاستقلال بالحمرا هالويك-اند (الدخول مجاني)

بمناسبة عيد الاستقلال، عم تدعيكن جمعية حماية الإنسان وجمعية تجار المقدسي تقضوا ويك إند مميّز بالحمرا، مع معرض و مهرجان الاستقلال نهار السبت والأحد 21 و22 تشرين الثاني! يومين ناطركن فيهن التسوّق، الأكل الطيّب، الموسيقى والنشاطات الترفيهية لكل العيلة.

خلال هاليومين، رح تتحول الحمرا – شارع المقدسي لوجهة احتفالية مليانة كيوسكات للتسوّق، وأصناف طيّبة بتقدروا تستمتعوا فيها خلال جولتكن بالمهرجان. وكمان، في ألعاب ونشاطات ترفيهية للصغار، ليكون في شي حلو للكل.

أمّا البرنامج، فبيبلّش نهار السبت مع الافتتاح الرسمي الساعة 4 بعد الضهر، على أن ترافقه موسيقى الجراح. وبعدها، بتكفّي الأجواء مع الفنانة كوكي والفنان شادي نادر، اللي رح يحيوا السهرة بعروض موسيقية. ونهار الأحد، الموعد مع حفل للفنان نجيب الحاج حسن ونشاطات كشفية بتقدّمها كشافة الجراح، وبتضيف أجواء حماسية على هالنهار.

إذا بعد ما قرّرتوا شو تعملوا بهالويك إند، هيدي فرصة حلوة تنزلوا عالحمرا، تتسوّقوا، تجرّبوا أكلات طيّبة وتقضوا وقت مع العيلة والرفقة، وتحتفلوا بعيد الاستقلال بأجواء مختلفة. والأحلى إنو الدخول مجاني!

📍 شارع المقدسي، الحمرا

🗓️ السبت والأحد 21 و22 تشرين الثاني

🕛 من 12 الضهر لـ12 بالليل

🎟️ الدخول مجاني

خبرونا، رح تزوروا مهرجان الاستقلال بالحمرا؟