غرفة موسيقى مخبّاية ببيت بيروتي عتيق… شو في بمار مخايل؟

بهالبيت البيروتي التراثي اللي تحوّل لكافيه، في مساحة فنية جديدة عم تضيف تجربة مختلفة للمشهد الثقافي بمار مخايل. تعرّفوا على «بيات» Bayyate، مساحة مخصّصة للموسيقى والفنون الأدائية، بتجمع بين أجواء البيوت البيروتية القديمة وروح الفن.

موجودة بالطابق الفوقاني من BEYt Garden Café، جوّا بيت بيروتي عريق عمره حوالي 140 سنة، وبتحمل «بيات» جزء من ذاكرة هالبيت وتفاصيله المعمارية. ومن أول ما تفوتوا على القاعة، بتلفتكن الأجواء اللي بتجمع بين الطابع التراثي والمساحات الفنية.

القاعة فيها كراسي خشبية مرتّبة باتجاه مسرح صغير، وبتحافظ على تفاصيل البيت القديمة متل القناطر والشبابيك الملوّنة، مع برادي حمرا بتضيف لمسة دافية للمكان. مساحة بتحافظ على روح البيت البيروتي، وبتعطي الموسيقى والفن مطرح خاص يلتقوا فيه.

بس «بيات» أكتر من غرفة موسيقى ببيت قديم. هي مساحة جديدة بتفتح المجال للقاء الفنّانين والجمهور، وبتعطي الموسيقى والفنون الأدائية مطرح خاص ببيروت. وكمان موقعها جوّا BEYt بيخلّي الزيارة تجربة مميزة،  فيكن تبلّشوها بقعدة بالكافيه والجنينة الخضرا، وتكمّلوها بنشاط فني بأجواء بيت بيروتي عتيق.

وحالياً، «بيات» عم تحضّر تكشف عن برنامجها المقبل! خلّوا عينكن عليها، لأنّها مساحة جديدة ممكن تضيف كتير للمشهد الفني والثقافي بمار مخايل!

شوفوا كمان:

14 محل محبوب صاروا جزء من هوية الحمرا!