7 Impressive Experiences At This Year's HORECA

مدونة

أبرز 7 مشاركين لازم تمرقوا عندن بمعرض HORECA بلبنان!

رجع معرض HORECA على الواجهة البحرية لبيروت من 10 لغاية 13 تشرين الثاني، وبيجمع شركات وأسماء من مختلف قطاعات الأكل، المشروبات، الضيافة والخدمات الغذائية. عدا عن الشركات الكبيرة، المعرض بيقدم هالسنة فرصة نتعرّف فيها على براندات لبنانية، أفكار جديدة ومشاريع محلية عم تقدّم شي مختلف ومميّز. جمعنالكن 7 مشاركين وعارضين بيستاهلوا تمرقوا على ستانداتن!

1. خبز سلطان

من أكتر من 50 سنة، وخبز سلطان حاضر على سفرتنا، وعم يقدّم مخبوزات صارت جزء من ذكريات أجيال من اللبنانيين. وهالسنة، عم يشارك بـ HORECA للمرّة الأولى، بهوية جديدة وتغليف جديد، بس مع المحافظة على النكهات اللي تعوّدنا عليها وكبرنا معها!

في كتير شغلات عم تصير عندن بالجناح، وبتبلش مع منتجاتن الجديدة ومشاريعهن الجاية. وحدة من هالمشاريع هي تعاون مع الشيف نادين حداد، يلي عم تشتغل مع خبز سلطان على مجموعة وصفات سهلة ومبتكرة بمكونات موجودة بكل بيت.

وكمان، عم يعرّفونا على Ayloul، براند جديد مستوحى من تقاليد المونة اللبنانية وفن حفظ المنتجات الموسمية. وفي مشروع تاني لمحبي الخَبز بالبيت، وهو خميرة الساوردو المجفّفة (Dehydrated Sourdough Starter).

2. Gäli Ceramics

تجربة الأكل الحلوة مش بس بتعتمد على شو موجود بالطبق، كمان على طريقة تقديمه وترتيب السفرة. وهون بيجي دور Gäli Ceramics، يلي بتقدّم قطع سيراميك بتضيف لمسة مميّزة لطريقة تقديم الأكل. ومن خلال مشاركتها بـ HORECA، عم تسلّط الضو على أدوات السفرة المعمولة محلياً، وخاصةً للمطاعم والكافيهات وأصحاب مشاريع الضيافة يلي حابين يعطوا طاولاتن ستايل خاص.

3. Plant A Universe

الابتكار اللبناني مش محصور بالمطبخ! Plant A Universe هو براند لبناني بيهتم بمنتجات العناية الشخصية الطبيعية، وعندو مجموعة من المنتجات للعناية بالتم والجسم. كمان، بيركّز على اختيار مكوّنات مدروسة وتغليف مستدام، وبيقدّم خيارات بتجمع بين العناية اليومية والاهتمام بالبيئة.

4. QOOT

بدل ما يمثّل براند واحد، QOOT Cluster بيجمع تحت سقف واحد مجموعة من المنتجين وأصحاب المشاريع الغذائية اللبنانية. وهالسنة، جناحن بـ HORECA بيضم 15 مشارك، يعني فيكن تكتشفوا مجموعة متنوّعة من المنتجات المحلية وتتعرفوا على الأشخاص اللي وراها. وبس تشوفوا الجناح الحلو يلي محضّرينه هالسنة، رح تفهموا ليه بيستاهل الزيارة!

5. Papa’s Mia Tacos

بتتذكّروا لعبة الكمبيوتر Papa’s Taco Mia، يلي كانت تخلّينا نحلم نعمل تاكوس بإيدنا؟ Papa’s Mia Tacos أخدوا هالفكرة من أيام الطفولة وحوّلوها لمشروع أكل حقيقي!

هالمشروع العائلي من بيروت بيقدّم التاكوس، البوريتو، الكيساديا، الناتشوز وغيرها من الأصناف المستوحاة من المطبخ المكسيكي. وفي خيارات بتناسب مختلف الأذواق، من تاكوس اللحمة والقريدس لخيارات نباتية. وهيدي تاني سنة على التوالي بيشاركوا فيها بـ HORECA!

6. Pick a Poke

من سنة 2016، وPick a Poke عم يقدّم أطباق البوكي المستوحاة من هاواي بلبنان، مع مكوّنات طازجة وتركيبات فيكن تختاروا منها حسب ذوقكن.

بس بتعرفوا إنو هالسنة عم يقدّموا أوّل كيمتشي مصنوع محلياً؟ اسمه Tiger Kimchi، وهو ملفوف مخمّر ومحضّر بالبيت، مع نكهة حرّة ومميّزة. وكمان عم ينافس على جائزة People’s Choice، يعني فيكن تصوّتوا لإلو!

7. Garasuki

كل شيف أو حدا بيحب يطبخ بيعرف أديه السكينة المناسبة بتفرّق بالتحضير والطبخ. Garasuki هو أوّل محل بلبنان متخصّص بسكاكين المطبخ وأدوات التقطيع الاحترافية، وعم يعرّف زوّار HORECA على هالجانب من عالم الطبخ.

خبرونا، في محل مشارك أو عارض نسينا نذكره؟