وين فيكن تجربوا أطيب صاج بلبنان؟

في أطيب من ترويقة صاج لبناني مميزة؟ الريحة لحالها بتدوخ والتحميصة غير عالم! خلونا نخبركن اليوم عن كم مطرح تجربوا فيهن أطيب صاج بلبنان.

1. كومسي كومصاج، الحمرا

هالمطعم بيقدم صاج لبناني مميز على الطريقة التقليدية، وكمان سندويشات بخبزة الصاج بمختلف الطعمات والمكونات، بتجربوا كل شي من الصاج اللبناني بالجبنة والزعتر، لسندويشات الصاج بالدجاج أو الفاهيتا أو الكفتة أو السجق مع حرّ، المنظر لحالو بشهي!

الرقم: 366 374 01

2. صاج بيروت، الجميزة

صاج بيروت جاهز يستقبلكن على أشهى منقوشة صاج بزعتر على الترويقة، وكمان صاج على البيتزا مع الجبنة والببروني لغدا خفيف ومميز بالجميزة.

بيشتغل كل شي على الإيد وبيعمل الصاج متل اللي بيعملوا أهل الضيعة وأطيب!

الرقم: 937 733 03

3. صاج الحنون، بكفيا

صاج الحنون صرلو أكتر من 15 سنة بيستقبل الناس على ريحة أطيب صاج. بيعجن وبيخبز الصاج على الأصول، ومشهور أديه كل منقوشة عندو بتطلع رقيقة وخفيفة على البطن وكتير طيبة، بتلاقوا عندو صاج بزعتر بلدي غير شكل، خصوصي مع جبنة!

بس أكيد لما تميلوا لعندو، ما تنسوا تجربوا الكنافة بالصاج، أطيب ترويقة لبنانية بكدشة وحدة!

الرقم: 292 593 03

4. الكوز كافيه، الباروك

الكوز كافيه بيتميز بقعدة مهضومة بالضيعة، رايقة وبترخي الأعصاب خصوصي الصبحيات على أطيب كباية شاي.

بتدوقوا أطيب ترويقة صاج بزعتر وجبنة مع بيض بالفخارة وعلى جنبن خضرا طازة مع زيتون.

الرقم: 357 612 81

5. جلسة العين، بيت شباب

بتلاقوا بكافيه قديم بضيعة بيت شباب أطيب صاج بالمنطقة، بيطل على ساحات الضيعة العتيقة وبيتميز بقعدة كراسي خشب على الموديل القديم. بتجربوا أطيب صاج معمول من الزعتر البلدي وبتغمسوا كل لقمة بصحن اللبنة وزيت الزيتون.

كمان بينفردوا بتقديم صاج برغر لغدا خفيف وطيب ما بتلاقوا منو وين ما كان.

الرقم: 368 729 71

شوفوا كمان، لقينالكن أطول سندويشة بلبنان بقلب طرابلس!