نجوم ستار أكاديمي: وين كانوا ووين صاروا اليوم؟

كلنا بعدو عنا الحنين لهالبرنامج يلي كبرنا علي وكنا ننطرو مناطرة كل نهار جمعة بعد الأخبار وكلنا بعدنا منتذكر أغاني الأكاديمية ونجوم الأكاديمية وطلاب الأكاديمية ومنحن لهل إيام الحلوة ومنتمنى لو ترجع.

اليوم رح نرجع نتذكر نجوم ستار أكاديمي من الموسم الأول للموسم التامن ونشوف وين كانوا ووين صاروا اليوم، البعض ترك الفن والبعض الآخر لمعت نجوميتو والبعض صار بمحل تاني.

١. محمد عطية (مصر)، ستار أكاديمي 1

كلنا منتذكر الفائز بأول جزء من ستار أكاديمي محمد عطية لي كان من أهضم طلاب الأكاديمية وعطول عامل جو حلو ومولعها وكلنا منتذكر الأغاني لي كان يعملها “بشارنو”، غنية “النوميني” وغيرن من النهفات المهضومة.

اليوم محمد عطية امتهن التمثيل والغنا وكل فترة بيعمل عمل جديد وعطول منشوفوا ببيروت لأن بحب لبنان كتير والرياضة كمان.

٢. هشام الهويش (السعودية)، ستار أكاديمي 2

هشام يمكن من الأشخاص يلي ربحت اللقب وما كتير منتذكرها، بس هشام كان شخصية تفاعلية مهضومة كتير بالأكاديمية، عندو قدرات غنائية واستعراضية وتمثيلية كوميدية عالية، وهيك قدر يتوج بلقب الموسم التاني.

من بعد الأكاديمية انطلق هشام بعالم تقديم البرامج ومشوارو الأول كان على الLBC، وبعدو لليوم عم يلمع بكل عمل بقدموا وكان آخرها “هذا مكانك” سنة 2022 و”المطانيخ” سنة 2023 لي عم ينعرض على القناة السعودية.

٣. جوزيف عطية (لبنان)، ستار أكاديمي 3

كلنا منتذكر قدي الفرحة عمت شوارع لبنان وخاصةً البترون نهار لي تتوج جوزيف في بللقب. كلنا كلبنانيي حسينا بالفخر، كان جوزيف صاحب الصوت الحلو والدافي والشخصية المرحة بالأكادمية.

جوزيف حالياً عايش بدبي وكل فترة وفترة بيعمل حفلات بلبنان وبرا وصار من أبرز النجوم بالعالم العربي وآخر أعمالو “كون” وبعدو مهضوم ما تغير. ومنقلوا كمان الحمدلله على السلامة يا جوزيف بعد الحادث لي تعرضتلوا وتضلك منور الساحة الفنية!

٤. شذى حسون (العراق)، ستار أكاديمي 4

من بعد جوزيف عطية، فازت النجمة العراقية شذى حسون باللقب وكانت معروفة بصوتها الرائع وحضورها المميز سواء باللون الشرقي أو الغربي وهيك كانت شذى أول بنت بتربح اللقب.

من بعد الأكاديمية، امتهنت شذى حسون الغنا وأصدرت عدد كبير من الأغاني متل “ليلة حلوة” و”مزعلني” وشاركت بدور بطولة أول مسلسل تلفزيوني إلها برمضان 2008 “رسائل من رجل ميت” وهوي مسلسل عراقي سوري مصري مشترك. أما مؤخراً فأصدرت غنية “حلم عمري” وصورتلها فيديو كليب.

٥. نادر قيراط (تونس)، ستار أكاديمي 5

بهل نسخة شارك النجم سعد رمضان ونال المركز التالت أما نادر فنال المركز الأول وكان معروف بالأكادمية أنو بغني بعدة لغات وأبهر الجمهور بصوتو الدافي.

بعد نجاحو بالمسابقة أصدر غنية بالفرنساري L’ange Perdu وامتهن كتابة الأغاني والموسيقى وحالياً عم يحيى حفلات فنية وموسيقية.

٦. عبد العزيز عبد الرحمان (السعودية)، ستار أكاديمي 6

تميز عبد العزيز بشخصيتو القوية والمرحة وصوتو الحلو والمميز وحضورو القوي على المسرح.

أصدر أول غنية إلو سنه 2009 “وافرض” بعد فوزو باللقب لي حققت نجاح كبير رغم عدم تصوير فيديو كليب. وأصدر بعدها عمل مشترك مع الفنان عبادي الجوهر “نحمد الله”، اليوم بتلاقوا أجدد نشاطاتو وأعمالو الفنية على صفحتو الخاصة على انستاغرام.

٧. ناصيف زيتون (سوريا)، ستار أكاديمي 7

حبيب قلب الجمهور اللبناني ناصيف زيتون ربح النسخة السابعة من المسابقة، وكان يقدم المواويل والأغاني الجبلية لوديع الصافي، ونال بوقتها حضورو وصوتو إعجاب وديع الصافي وسلطان الطرب جورج وسوف والفنان الياس كرم.

من بعد الخروج من الأكاديمية تربع ناصيف على عرش النجومية بلبنان والعالم العربي وصار نجمو يسطع أكتر وأكتر. أكتر الأعمال شهرة لناصيف “مش عم تضبط معي”، “بربك”، “على أي أساس” وغيرن كتير، وآخر أعمالو السنة كانت غنية “كراميلا”.

٨. نسمة محجوب (مصر)، ستار أكاديمي 8

ربحت نسمة محجوب لقب النسخة التامنة من ستار أكاديمي وهيي بنت المخرج علاء محجوب لي انعرفت بصوتها الحلو وحضورها الملفت.

اليوم نسمة بعدها عم تغني وكل فترة والتانية بتنزل أعمالها وتسجيلاتها على صفحتها على انستغرام.

شوفوا كمان، ٦ فنانين لبنانية منتمنى لو يرجعوا على الساحة الفنية.