٦ فنانين لبنانية منتمنى لو يرجعوا على الساحة الفنية

حبينا اليوم نتذكر أبرز الفنانين والفنانات اللبنانية لي اكتسحوا الساحة الفنية بسنوات الألفية وصاروا من الأشهر على الساحة العربية وبعدنا لليوم منسمع أغانيهن ومنرددها ومنتمنى لو ترجع هالإيام الحلوة لي صارت جزء من الذاكرة الجميلة.

١. دارين حدشيتي

كلنا منتذكر الصبية يلي طلت على الشاشة لأول مرة سنة 2005 بغنية “قدام الكل” وصارت حديث الساعة وفاتت على قلوب كتار من أول غنية وهيك شقت دارين طريق نجاحها الفني بظل منافسة فنية شرسة بوقتها ورجعت أصدرت عدد كبير من الأغاني لي صاروا جزء من الأرشيف اللبناني الشهير “عم تتحلي”، “راسي على راسك”، “نحنا بالبترون” وغيرن من الأغاني الفرحة والمرحة.

دارين اشتقنالك وياريت لو بترجعي!

٢. دينا حايك

من أهضم الفنانات اللبنانية وصاحبة الصوت الجميل المليان حنان، طلت على الجمهور لأول مرة سنة 2005 بغنية “سحر الغرام” ورجعت أصدرت وحدة من أجمل الأغاني الرومانسية على الإطلاق” درب الهوا” لي تصدرت كل الإذاعات والتلفزيونات وهيك صارت دينا من أهم الوجوه بروتانا ومن أجمل أعمالها “كتبتلك” و”تعا لقلبي”.

دينا نصابت مؤخراً بمرض السرطان وعم تتعالج، نحنا منتمنالا الشفاء العاجل ونضل نشوف ضحكتها ونسمع هالصوت الحلو.

٣. ايوان

صاحب الصوت الراقي، الفنان المبدع لي تربع على عرش الأغنية الشبابية بالألفية، بلش مشوارو الفني بتلحين أغاني لأشهر الفنانين متل باسمة، كارول سماحة وفارس كرم. ببداية مشوارو الفني كتب غنيتو الشهيرة “وعدني وقول انشالله” يلي كسرت الأرض، ورجع كتب ولحن غنية “ذنبي اي” لي انشهرت بشكل كبير وهيك صار من أشهر الفنانين الشباب على الساحة الفنية وبرصيدو عدة أعمال مشهورة “قلبي سهران”، “أهلاً وسهلاً”، “ولا في الأحلام” وغيرن كتير.

منتمنى لو يرجع ايوان على هاللون من الأغاني ويرجع البوب الرومانسي الحلو على لبنان.

٤. غريس ديب

غريس ديب من الفنانات لي انشهرت مش بس بأدءها باللغة اللبنانية، كمان باللغة الفرنسية والإنغليزية وصوتها الدافي، أول ظهور لإلها كان عام 2003 من خلال غنية مشتركة” وان كان عليا” مع الفنان عاصي الحلاني. رجعت تعاونت غريس مع المطرب الفرنسي جان جاك غولدمان، لي أطلق عليها لقب “داليدا العرب” بغنية “Comme toi” لي خلت غريس ديب تصير مشهورة محلياً وعالمياً. ومن أشهر أغانيها الرومانسية “أنا حبيت” و”أكتر من غرام”.

صراحة اشتقنا لهل نوع من الأصوات الدافية والحلوة، يا ريت نرجع نشوف هل موهبة!

٥. مايا نصري

انطلقت ببرنامج “كأس النجوم” عام 1999 بتقديمها أغاني الراحلة ليلى مراد، ورجعت انشهرت بأغانيها “أخبارك إيه”، “خليني بالجو”، “روح”، “حبة حب” وغيرها من الأغاني الرومانسية. مايا كمان دخلت عالم التمثيل بمصر ورجعت تجوزت المخرج إيهاب لمعي ومن وقتها حسينا مايا صارت أكتر مكرسة حياتها لعيلتها وولادها. على الرغم من محاولتها للعودة إلا إنو أغانيها ما كانت على نفس مستوى شهرة الأغاني السابقة.

منتمنى هل صوت الحلو وهل طلة الخفيفة ترجع تزين الشاشة اللبنانية بأغاني تلمس القلب.

٦. جاد نخلة

صاحب الصوت الرومانسي، شارك ببرنامج “استديو الفن” وانعرف بصوتو الدافي، تعاون مع شركة العبدول وعام 2001 قدم ديو مع الفنانة ديانا حداد “ويلي منك” وألبوم “مغرم” عام 2002 واشتهر بغنية “وانا مالي” المصرية ورجع تعاون مع الملحن مروان خوري بكتير من الأعمال الرومانسية الجبلية متل “بقى يرضيك” و”مغرم” وغيرها من الأغاني الشهيرة.

أرشيف هل فنان حافل بالأغاني الجميلة، منتمنى نرجع نشوفوا بتعاون مع الفنان مروان خوري وبحفلات جايي.

شوفوا كمان، من أيا جامعات تخرجوا ملكات جمال لبنان؟