بوكس بيخليكن تحضروا برغر المطاعم من البيت…شو محضّرلكن الشيف كريم؟

في أوقات منشتهي فيها برغر طيّب، بس ما بيكون بدنا نطلع من البيت، وبرغر الدليفري مش دايمًا بيوصل سخن وطازة. كرمال هيك، الشيف اللبناني كريم بيبي حضّرلكن حلّ عملي: Burger Kit! بوكس فيه كل شي بتحتاجوه لتحضّروا برغر متل تبع المطاعم بالبيت، وإنتو بس عليكن تطبخوا اللحمة!

البوكس بيجي مع كل المكوّنات اللازمة لتحضير البرغر. إنتو بتختاروا نوع اللحمة اللي بتحبّوه، من برغر الستيك هاوس الكلاسيكي لبرغر الواغيو سماش.

من ستاند برغر بنيويورك لملحمة ببيروت

بلّشت قصّة كريم بيبي مع البرغر سنة 2013، وقت كان عم يدرس الطبخ بنيويورك. بيوم من الأيام، وبعد ما خلص درسه، مرق على كيوسك برغر صغير بساحة ماديسون سكوير. كان هيدا أول فرع لـ Shake Shack. هونيك، جرّب برغر السماش للمرة الأولى، اللي بيتميّز بلحمته المحمّرة والمقرمشة من برّا والطرية من جوّا، وكانت هالتجربة كفيلة تغيّر نظرته للبرغر. وبعدها، جرّب برغر In-N-Out بأول زيارة إله على لوس أنجلوس، وزاد حبّه لهالأكلة!

لما رجع على بيروت، كان كريم سنة 2017 عم يدير مطبخ مطعم Beroe. وقتها، ضاف على المنيو برغر سماش من تحضيره، مع صوص سرّي خاص فيه. وهيك صار من الأطباق اللي الزباين بيرجعوا عالمطعم كرمالها.

اليوم، عند كريم ملحمة أونلاين بتوفّر لحمة بجودة المطاعم لتقدروا تحضّروا أطباق مميّزة بالبيت. وبيختار موردين بعناية من 4 قارّات، ليقدّم لحمة بجودة عالية. أما كيت البرغر، فهو فرصة لتجرّبوا البرغر اللي قضى سنين يطوّر وصفته.

شو موجود بقلب Burger Kit؟

كل كيت بيكفّي شخص واحد، وفيه خبز بطاطا طري، جبنة شيدر، كبيس، بندورة، خس مقطّع، الصوص السرّي تبع الشيف كريم، وسلطة كولسلو عالجنب.

وإذا بدكن تطلبوا لأربعة أشخاص، فيكن تاخدوا 4 بوكسات وتزيدوا أقراص اللحمة حسب ما بتحبّوا.

أي نوع برغر فيكن تختاروا؟

حسب ذوقكن، فيكن تختاروا من بين كذا نوع لحمة. إذا بتحبّوا البرغر الكلاسيكي، في برغر الستيك هاوس، اللي بيجي سميك وطري. أما إذا بتفضّلوا طعمة أغنى، في لحمة أسترالية من نوع بلاك أنغوس، وكمان لحمة بقر من مزارع بتتغذّى فيها الأبقار عالعشب، وهي خيار مناسب للي بيفضّلوا لحمة أقل دسامة.

أما إذا إنتو من محبّي برغر السماش، فلازم تجرّبوا برغر الواغيو سماش! بيتحضّر من قطعتين لحمة واغيو، بتكبسوا عليهن بالمقلاية وهي حامية كتير، لحتى يصيروا رقاق ومحمّرين، وبعدين بتضيفوا الجبنة اللي بتدوب فوقهن.

وفي برغر جديدة عالطريق! الشيف كريم عم يشتغل على وصفة جديدة باللحمة المعتّقة على الناشف، فخلّيكن ع متابعة!

شو في غير البرغر؟

ال Burger Kit هو واحد من الخيارات اللي بتلاقوها عند الشيف كريم، بس في أصناف تانية كتير فيكن تطلبوها لتسهّلوا تحضير الأكل بالبيت.

أكلات لبنانية جاهزة للفرن. إذا بتحبّوا الأكل البيتي بس ما عندكن وقت للتحضير، فيكن تطلبوا كبّة بالصيّنيّة جاهزة للخبز وبتكفّي لأربعة أو ستّة أشخاص، وورق عنب ملفوف حبّة حبّة، وشيش برك. وكل هالأصناف محضّرة بلحمة بقر بتتغذّى على العشب.

أنواع مختلفة من اللحمة. بتلاقوا فيليه لحم بقري، وريب آي أسترالي من بقر بيتغذّى على العشب، ولحمة بلاك أنغوس، وشرايح لحمة طرية، ومكعّبات لحمة للطبخ، ولحمة مفرومة قليلة الدهون بنسبة 98% أو 90%. وفي كمان خلطة كفتة خاصة، وأصناف ملتوتة بالكعك متل إسكالوب اللحم البقري وإسكالوب العجل المحضّر بالحليب الهولندي.

دجاج لكل الوصفات. من صدور الدجاج البونلس والصدور المشوية، لأفخاد بونلس، ولولي بوب، ودجاجة كاملة للشوي، في خيارات مختلفة لتختاروا منها حسب الطبخة اللي بدكن تحضّروها.

صوصات بتكمّل الطبق. في مجموعة صوصات محضّرة بالبيت بتضيف نكهة مميّزة لأكلاتكن، منها صوص كافيه دو باري، وصوص الفطر، وصوص زبدة الكاري، وصوص السمسم والزنجبيل والصويا، وصوص الثوم والبابريكا والليمون.

كيف تطلب

فيكن تطلبوا عبر تطبيق Toters، من خلال البحث عن The Butcher Shop، أو مباشرةً من موقع karimbibichef.com، أو تتواصلوا معهن عبر واتساب!

التوصيل متوفّر بمختلف مناطق بيروت الكبرى.

الأسعار المذكورة هي بحسب الأسعار المعروضة على Toters والموقع الإلكتروني وقت كتابة المقال، وقابلة للتغيير.

شوفوا كمان:

محل الشوكولا والجيلاتو الإيطالي الشهير Venchi صار مفتوح هلأ ببيروت سوق.

وايه، عنجد بيستاهل!