أكل وشرب
أفخم ترويقة: كنافة على الصاج من هيدا المحل!
خلونا نكون صريحين مع بعض: ما في أطيب من ترويقة الكنافة! كيف إذا كانت ب لوك جديد وكلنا منحبو؟ إذا انتو من محبي الصاج والكنافة، ومحتارين شو تختاروا لقينالكن الحل!
كلنا منعرف عجينة كعكة الكنافة كيف بتكون سميكة ومحشية بالجبنة، بس شي مرة سمعتو بكنافة ع الصاج؟ صاج الحنون محل بقلب بكفيا وصرلو أكتر من ١٥ سنة بيستقبل الناس على الصاج الطيب والخفيف، وتحديداً عندو فيكن تجربوا الكنافة ع صاج، خلونا نعرف شو خبريتها.
الطريقة اللي بيعجن وبيخبز فيها هالمحل متل الطريقة التقليدية عند أهل الضيعة، بتطلع العجينة عندو رقيقة وخفيفة، وتحميصتها من فوق غير شكل، بيستعمل بدل عجينة الكنافة المعروفة عجينة الصاج وبيمد الكنافة عليها، بتطلع مليانة جبنة ومغّرقة بالقطر مع شوي قرمشة للخبزة، يا عين!
صاج الحنون كتير محبوب ببكفيا لأنو المناقيش عندو رقيقة وخفيفة على البطن وبتشهي، بتلاقوا عندو صاج مع زعتر الضيعة، بتطلع طعمتو روعة مع الجبنة الدايبة، صاج بكشك بلدي، صاج بلحمة بعجين، وحتى صاج على بيتزا!
خبرونا، بتجربوا هالترويقة؟
للمزيد من المعلومات، اتصلوا على 292 593 03
شوفوا كمان، وين فيكن تجربوا أطيب صاج بلبنان؟
عبالكن شي طيب؟ شوفوا أطيب الأطباق حول لبنان هون.