شو عاملين هل ويك-أند؟ إذا بعد مش عاملين شي وعبالكن تموهوا وتروحوا على شي محل قريب لتغيروا جو، رح نخبركن عن مهرجان الكرز لي رح يصير هل ويك-أند بحمانا وتحديداً نهار الأحد.
الجو رح يكون ولعان: فرح وبسط وموسيقى وأكل طيب.
وين رح يصير المهرجان؟ بتتجمعوا عبكرا الصبح على الساعة 10 بساحة الضيعة وبتبلش المغامرة لي رح تعيشوها لأول مرة بحياتكن: تحويش الكرز!
رح تبرموا على كل جنينات مزارعي الضيعة وتقطفوا كرز قد ما بدكن وتعبوا سلتكن، بس تخلصوا رح تتجمعوا بسوق حمانا العتيق وتتفرجوا على ستاندات الأكل والشرب والمعارض الفنية والأشغال الحرفية بالإضافة لمنتوجات يدوية ومونة بلدية ومحلات إكسسوارات.
رح تلاقوا قصص معمولة بس من كرز متل مربى الكرز وبوظة على كرز وشراب الكرز وغيرن وغيراتن.
الولاد كمان رح يكون إلن حصة كبيرة، رح يتسلوا كتير لأن في Kids Zone مخصصة بس للزغار، رح ينظموا ألعاب ونشاطات مسلية متل inflatable games وعروض جمبازية مدهشة.
رح يكون كمان في فرق موسيقية ورقص وفرح مع فرقة باراد من الساعة 12:30 لل2 بعض الضهر ومن الساعة 4 لل5:30 بعض الضهر.
وحزروا شو أحلى شي رح تشوفوا؟ مهرجان السفرة الحمانية لي رح يصير من الساعة 1 للساعة 4 بعد الضهر، رح فيكن تدوقوا أطيب الأكلات الحمانية من تحت ديّات ستات الضيعة بساحة الميدان مع هل برودات الحلوين.
جيبوا معكن رفقاتكن وقرايبينكن وقضوا نهار مليان ضحك وفرح وتسلية وعملوا ذكريات ما بتنتسى!
كل هيدا وما تحمستوا بعد؟ يلا على حمانا!
للمزيد من التفاصيل اتصلوا على 122 351 81
.شوفوا كمان، أحلى كزدورة على فقرا: قعدة جبلية ولقمة بيتوتية