بيت السعادة: اجمل بيت ضيافة بأحضان طبيعة دير القمر

في أجمل من طبيعة الجبل بلبنان؟ الطقس الدافي والمشمس بدو طلعة صوب الشوف!

اليوم رح نعرفكن على جوهرة مخفية بضيعة دير القمر التراثية، مخبى بين أعالي الجبال بيت ضيافة اسمو La Maison du Bonheur أو بيت السعادة، هالبيت عبارة عن كومة جمال وسحر بأحضان الطبيعة، بيدخل على قلبكن السعادة مجرد ما تدخلوا عليه!

بيت السعادة هو بيت حجر مكنكن وزغير، مزين بالورد الجوري وبتفوح منو ريحة الأرض، محضون بالشجر والزريعات الملونة، عندو جنينة بتذكركن بجنينة بيت التيتا والجدو، نافورة مي قديمة ودعسة حجر ومراجيح مهضومة لترخوها بين نسمات الهوا اللطيفة وريحة الورد.

القعدة عنجد آخر رواق وبتريح النفسية وما بتسمعوا فيها إلا صوت العصافير، عندن تراس بيطل على أجمل المناظر بدير القمر، جبال عالية ووديان عميقة وغابات من شجر الصنوبر والسنديان، بتقضوا وقت حلو وقدامكن جاط فواكة، بترتاحوا والهوا عم يلعب لعب بين الشجر، بتعملوا غدا مشاوي طيب، وبتجتمعوا على فيو روعة خصوصي وقت غروب الشمس!

البيت بقلبو كذا أوضة مريحين ورايقين، بتناموا نومة هنية وبتفيقوا الصبحيات، بتتمشوا بالجنينة مع فنجان قهوة، وبتحضروا حالكن لأطيب ترويقة بلدية من فول وحمص ومناقيش ولبنة وجبنة مع خضرة طازة وزيتون.

أحلى عطلة ناطرتكن ببيت السعادة، يلا على دير القمر!

للمزيد من المعلومات، اتصلوا على 637 622 03

شوفوا كمان، ٥٠ محل تزوروه هالصيفية بلبنان: من الشمال للجنوب!