بيت نور: بيت ضيافة بأجواء رومانسية وصيفية روعة
اليوم رح نطلع على ضيعة بيت شباب المشهورة ببيوت الصخر والقرميد الأحمر، الطقس البرود بالصيفية والطبيعة الساحرة، وحدة من الضيع اللبنانية اللي بتحوي جواهر مخباية خلونا نكتشفها سوا. إذا عبالكن عطلة غير شكل ووقت صيفي مميز، ضبوا الشنطة وخلونا ننطلق على كاسا نور أو بيت نور بأحضان بيت شباب، عبارة عن بيت ضيافة بأجواء رومانسية وصيفية روعة.
أول ما تدخلوا على بيت نور رح يسحركن أسلوب العمارة للبيوت اللبنانية التراثية، بيتميز بتراسات كبيرة مزينة بالورود والقعدات الرومانسية والقناطر العالية والمراجيح الحلوة، بلكونات بإطلالة ساحرة الجمال، جلسة قناطر غير شكل بيطلع عبالكن تقعدوا تشربوا قهوة عليها ساعات وساعات على ألحان أغاني فيروز.
جنينات بيت نور جاية من الأحلام، بتفوح منها ريحة الورد والغردينيا، والهوا بيغزل بين شجرها غزل!
أمّا البيت من جوا شبه القصور، بيتميز بالموديل القديم والكلاسيكي الفاخر من الشبابيك الخشب والتريات والتحف واللوحات، الغرف المقنطرة والحيطان الصخر، والقعدات الرايقة والمضوية بضو الشمس. بيت نور فيه كل شي ممكن تحتاجوا ومأمنلكن كل وسايل الراحة والرفاهية لتقضوا عطلة الأحلام مع الشريك أو العيلة.
والأحلى انو في مسبح كبير مميز لترخوها تحت الشمس هالصيفية، تعملوا مشاوي مع العيلة وتتغدوا على التراس، وقعدة من العمر!
للمزيد من المعلومات أو الحجز، شوفوا الرابط هون.
شوفوا كمان، أجمل الأوتيلات بمدينة طرابلس هالصيفية
