٥ مطارح فيها قعدة حجر ساحرة بلبنان

قعدة حجر القديم من أحلى القعدات اللبنانية، ومنلاقيها بالبيوت التراثية والأماكن التاريخية. قعدة بترجع التراث وجو أيام زمان، بيطلع عبالكن تكنكنوا فيها ساعات خصوصي بهالطقس الخريفي. اليوم إخترنالكن 5 من أجمل قعدات الحجر بلبنان، إن كانوا مطاعم أو بيوت ضيافة أو كافيهات!

إذا عبالكن قعدة الحجر بالسوق القديم، لازم تجربوا ليف بالبترون:

ليف عبارة عن كافيه مهضوم مخبى بالسوق ومحطة حلوة للزوار والسياح بالبترون. بيتميز بقعدة الحجر وتقديم الحلويات الطيبة. عندو مخبوزات شهية، حلويات موسمية، قهوة روعة، وقعدة برا على سوق البترون. هلق بالخريف، الجو بيكون كتير لطيف لكباية شاي وكيك طازة عند ليف!

إذا عبالكن قعدة الحجر مع كاس نبيد لبناني، لازم تجربوا Vine بسمار جبيل:

هالجوهرة مخباية بضيعة سمار جبيل جنب الكنيسة الأثرية وقلعة سمار جبيل. اللي بيميز هالمطرح انو بيقدم نبيد لبناني محلي من المعاصر بالمنطقة، عندن أكل طيب وقعدة بالهوا الطلق للسهرات تحت الأضوية الخافتة. بتعرفوا هالمطرح من الحجر القديم والعريشة المزينة جدرانو.

الرقم: 882 455 71

إذا عبالكن قعدة حجر عمرها آلاف سنين مع قهوة طيبة، لازم تجربوا Even بالجبيل:

تخايلوا هالكافيه كان بيت حجر أثري عمرو أكتر من 300 سنة! بتلاقوا قعدة القناطر والحجر القديم وجو الرواق مع القهوة الطيبة أو المشروبات المميزة.

الرقم: 666 737 09

إذا عبالكن قعدة حجر مع عشا رومانسي على ضو الشموع، لازم تجربوا مطعم قرطبة ببعبدات:

مطعم قرطبة جوهرة بين الصنوبر والجبال ببعبدات، عندو قعدة كهف من الحجر القديم، بتنبسطوا بعشا على صوت البيانو والموسيقى الكلاسيكية وضو الشموع، أديه رومانسي؟

والقعدة برا بترد الروح خصوصي بالخريف لما النسمة حلوة والمناظر الجبلية ساحرة.

الرقم: 705 614 71

إذا عبالكن قعدة حجر مع نومة بالجبل، لازم تجربوا بيت الجبل بدير القمر:

من أجمل بيوت الضيافة الرومانسية بلبنان. بيطل على الوادي وعندو قعدة حجر تراثية مزّينة بالفن والجماليات. عندن مطعم بالجبل مع بيتزا على الحطب وبوفيهات مميزة. وجهة رومانسية بناسب تقضوا كم نهار لحالكن مع الشريك بدير القمر.

الرقم: 767 160 71

شوفوا كمان،٥ مطاعم فرنسية لازم تجربوها بلبنان