٧ بيوت ضيافة بتاخد العقل ببيت الدين ودير القمر

لكل شخص عبالو يهرب من كل شي، من الهموم والعجقة وضغط الحياة ليقضي يومين حلوين بطبيعة الجبل يلي بتاخدنا على عالم تاني مليان رواق ومناظر جبلية ودفا، رح ناخدكن اليوم على بيوت ضيافة بدير القمر وببيت الدين ويلي عندن أجمل جو وأحلى قعدة لمدة يومين أو أكتر.

١. بيت كاتالبا Catalpa Home، بيت الدين

قعدة رومانسية مع بيسين داخلي ودافي بنص الشتوية ناطركن بهالمحل. من أجمل وأغرب بيوت الضيافة الموديرن بلبنان، بيتميز بوجود بيسين بقلب أوضة النوم ولي عبالو بيرخيها بقلب المي وبيتفرج على شي فيلم هوي ومغمور بالمي من كل الميلات. الأوض مريحين كتير بتحسوا حالكن مسافرين على جزر بالي وبعاد عن كل ضجة وعجقة المدينة وعم تعيشوا أجمل إيام السنة.

الرقم: 089 093 03

٢. بيت الدير، دير القمر

بيت حجر من قناطر بيتمتع بمنظر خيالي بعاصمة الأمرا بدير القمر. بيتميز هل بيت بهندستو التراثية وديكورو المميز التاريخي وبالقناطر الساحرة الجمال وبكل تفاصيلو وكل زاوية وحجرة في بتخبر قصة. فيكن تحتفلوا بمناسباتكن العائلية الخاصة عندن وتستمتعوا بالمساحة الملكية والفيو الخيالي أو تجو بس لتقضوا يومين حلوين.

الرقم: 096 707 03

٣. رواق فيلاج Rawa2 Village، دير القمر

كتير حلو الرواق بقلب الجبل، هالبيت المميز قاعد بقلب الطبيعة ورح يخليكن تعيشوا عطلة رايقة ومميزة مع العيلة أو الأصحاب. البيت مهضوم وزغتور بس فيو كل شي إنتو بحاجة لإلو لتقضوا يومين من العمر مع قعدة تراس مميزة.

الرقم: 177 512 03

٤. بيوتي، معاصر بيت الدين

من أشهر بيوت الضيافة بلبنان، بيتميز بوجود عدة بيوت زغار جاهزين يستقبلوكن بأحلى جو جبلي مع قعدة حجر تراثية ومنظر جبلي برد الروح. ما في أجمل من القعدة بأوضة حجر تراثية مع شبابيك بتطل على الشوف وقناطر من أجمل ما يكون. بيتألف من ٨ بيوت محاطة ببيسين ومساحات خضرا هادية ومجهز بكل شي لتعيشوا راحة نفسية وجو بياخد العقل.

الرقم: 200 726 03

٥. بارادايز فيلا Paradise Villa، دير القمر

متل كل شي يدير القمر هل بيت عبارة عن مجموعة من البيوت الملوكية مع بيسين وشيميني وشجر زيتون داير من دار. القعدة على التراس بترد الروح مع المراجيح والطاولات والكراسي والفيو المفتوح على الشوف. أما النومة جوا مريحة وهادية وبتروق النفسية التعبانة.

الرقم: 809 216 03

٦. ديار القمر، دير القمر

عبارة عن بيت مخبى بالطبيعة وعندو أجمل فيو وقعدة مراجيح برا، النومة جوا دافية حد النار مع كل شي ممكن تطلبوا. فيكن تطلبوا ترويقة حسب اختياركن، وما في أجمل من سهرة النار والموسيقى يلي بتجمع الكل على اللقمة الطيبة. وإذا حابين تقضوا عطلتكن بقلب البيت، كل شي موجود لتدللوا حالكن عالآخر.

الرقم: 986 111 03

٧. بيت الجبل، دير القمر

هالبيت الحجر المميز عبارة عن بيت ضيافة ومطعم بنص الطبيعة. ما في أحلى من المشوار على الجبل لنغير جو شوي وكيف إذا كانت القعدة مع فيو شي بطير العقل وقعدة دافية للشتوية مع أطباق لبنانية وترويقة بلدية بتشهي. على التراس حلو فنجان القهوة بين البركة والمراجيح والشجر وقدام المناظر الطبيعية الخلابة. أما النومة بالأوض حد النار بتدفي القلب والروح.

الرقم: 767 160 71

شوفوا كمان، ٦ بيوت ضيافة وأوتيلات بتاخد العقل بالأرز.