٤ بيوت ضيافة بلبنان بتشبه عالم الأحلام!

اليوم رح نعرفكن على ٤ بيوت ضيافة بلبنان بتشبه عالم الأحلام لإذا عبالكن تقضوا يومين حلوين بمحل كتير مميز واستثنائي رح يحققلكن أحلامكن.

١. بيوفيليا، الأشرفية

من أجمل بيوت الضيافة يلي رح تشوفوها، الأوض رومانسية ومريحة للنظر وللقعدة مع أضوية خافتة وما في أجمل من النومة بقلب أوضة النوم مع كل الشموع وموسيقى رومانسية. بقلب أوضة النوم، بتلاقوا جاكوزي وفيكن بالشتوية تستمتعوا بكاس نبيد إنتو وبالمي وبس تخلصوا بتنشفوا وبتطلعوا على التخت دغري.

الرقم: 911 195 70

٢. بارادايز Paradise Guesthouse، العاقورة

عبارة عن قصر متل قصور الأحلام، بيتألف من عدة غرف وجنينة شرحة مع منظر جبلي ساحر. عنجد هالبيت بيشبه قلعة من إيام زمان، رح تخليكن تعيشوا حياة الأمرا لنهار، ورح يخليكن تخلقوا أحلى ذكريات لكل مناسباتكن! ومش بس هيك بقلب الجنينة بتلاقوا كواخ خشب زغار مهضومين رح يخلوكن ترجعوا أحلام الطفولة.

الرقم: 467 536 76

٣. كاسادار، طريق عنايا

بس تفوتوا على هالبيت رح تسافروا بالزمن وترجعوا لورا، بتلاقوا بقلبو حمام روماني من حجر محاوط بالشموع والأضوية الخفيفة مع منظر من عالم الخيال. القعدة بالأوضة رح تسرقلكن قلبكن، تخت معلق متل مرجوحة بالسقف وتحتو بيسين شوفي مع شيميني لتحسوا بالرومانسية على الآخر.

الرقم: 059 019 03

٤. بيت السلطان، تنورين التحتا

هالمحل بيجمع الفخامة والطبيعة وبيعشكن أجواء السلطنة العثمانية مع نفحة موديرن وبيسين وجنينة بتاخد العقل. بيشبه قصر الأحلام، قريب من السما وجار القمر، حدو في جنينة كبيرة، جاكوزي وشيميني: يعني متل قصص ألف ليلة وليلة. بالليل، تركوا كل شي وحطوا موسيقى حلوة وحضروا لقمة خفيفة لسهرة ممتعة على البيرغولا حد الشوميني تحت نجوم السما.

الرقم: 559 884 03

شوفوا كمان، ٤ بيوت ضيافة وأوتيلات بتاخد العقل بدوما!