شو مشاريعنا
أجمل بيوت الضيافة بحدث الجبة للشتوية
على إرتفاع ١٤٠٠ متر، بتلاقوا ضيعة “حدث الجبة” البشرانية المطلة على وادي قاديشا، قريبة على محميات الأرز ووادي تنورين وبتتميز بموقع ومناخ وطبيعة استثنائية . هالجوهرة الشمالية محافظة على طبيعتها الخلابة، روحانيتها ورواقها، بساطتها وتراثها اللبناني، من بيوت القرميد الأحمر للشوارع والحارات القديمة. كتار زاروا هالضيعة وتركت أثرها بقلوبن لجمالها البسيط وكرم ناسها. اليوم رح ناخدكن مشوار زغير على حدث الجبة لنشوف أجمل بيوت الضيافة بحدث الجبة للشتوية.
1. بيت الحارة، حدث الجبة
بيت الحارة عبارة عن بيت الضيعة اللبناني القديم، عمرو ٧٠ سنة ومليان دفى وكنكنة. هالبيت الزغير بياخدكن على الزمن الجميل، من غرف مزينة بصور صباح وفيروز ووديع الصافي. عندو قعدة غير شكل جنب الصوبا مع قعدة تقليدية ودافية.
والحلو انو عندن قعدة مهضومة على البلكون، مع فيو ع الضيعة وشوارعها القديمة.
الرقم: 190 329 70
2. بيت جيران القمر، حدث الجبة
هالفيلا الحلوة قاعدة فوق الوادي مع إطلالة من الخيال. فيها كل وسايل الراحة والرفاهية هالشتوية. رح تستمتعوا بالهوا الشمالي، المنظر الخلاب، جو الضيعة، دفى الصوبا، والكنكنة مع أحبابكن.
الرقم: 975 593 03
3. Auberge El Hadath، حدث الجبة
هالمطرح كان عبارة عن بيت لبناني ساحر عمرو سنين، وصار بيت ضيافة مفتوح لكل زوار الضيعة. مكان رح بتحسوا فيه بجمال التراث اللبناني وكنكنة القعدة الجبلية.
الرقم: 008 422 03
خبرونا حبيتوا مشوارنا على بيوت الضيافة بحدث الجبة؟ وأي رح تزوروهن هالشتوية؟
شوفوا كمان، مشوار على أجمل بيوت الضيافة بإهدن للشتوية