٦ أكلات لبنانية بيستغربوا منها الأجانب

المطبخ اللبناني من الأطيب بالعالم، عناّ الشاورما والتوم و المشاوي والحمص و التبولة والفتوش وأطيب ترويقة بالدني، من الكنافة و المنقوشة والفول، عدا عن المونة اللبنانية الأصيلة، وإذا منبلش بالأكل اللبناني ما منخلص. ولأنو كتار من الأجانب والعرب بيقصدوا لبنان لثقافته وأكله وسياحته وطقسه الحلو، كمان كتار منن (حتى لو عرب) بيستغربوا من أكلات بس اللبنانية بيعملوها أو بياكلوها. فخلونا نخبركن عن ٦ أكلات لبنانية بيستغربوا منها الأجانب. 

١. الكراعين و الفوارغ

و تسمياتها كتيرة من مقادم وكروش وغمة، يعني حسب منطقتكن، بس هي عبارة عن إجرين الخروف ومصرانو مطبوخين، أكلة جبلية و غريبة شوي للأجانب بس دسمة و تحضيرها يعتبر صعب. وإذا حابين تجربوها، شوفوا ٥ مطاعم بيعملوا أكلة الفوارغ بلبنان. 

٢. اللحمة النية

يمكن من أكتر الأكلات اللبنانية اللي بيستغربوا منها الأجانب هي اللحمة النية، من كبة وفريكة وسودة. بس هيي اللحمة ضروري تتاكل طازة مع بهارات وخضرة. 

٣. المنقوشة

المنقوشة مع انو خبريتها بسيطة، بس الأجانب عطول بيفكروها بيتزا (بس المنقوشة أطيب أكيد)

٤. الهريسة

الهريسة مش أكلة هينة أبداً بس يمكن أصعب شي نشرحوا للأجنبي هي طريقة تحضيرها، خصوصي بالضيع وبقلب الطنجرة الكبيرة. 

٥. نخاعات وبيض غنم

للصراحة ممكن من الصعب نقنع الأجنبي انو النخاعات (مخ الغنم) أكلة طيبة.

٦. لسانات الغنم

يعني حتى لسان الخروف مش زامط من اللبنانية!

وانتو شو في أكلات لبنانية بتحسوها غريبة؟ وفي أكلات بضيعكن كمان أغرب من هيك؟ 

شوفوا كمان، المشطاح بجريش…خبز الجنوبيّة وتراث بحد ذاتو