داني توماس، النجم اللبناني اللي لمع عالشاشة الأميركية بالستينات

اليوم رح نعرفكن على داني توماس، شخصية لبنانية الأصل ونجم الستينات اللي إعتلى المسرح العالمي وزيّنت صورتو شاشات التلفزيون الأميركي. 

داني توماس، فخر لبنان بالمهجر

داني توماس، اللي اسمه الحقيقي “آموس مزيد يعقوب كيروز”، هو ابن بشري اللي هاجرت عيلتو اللبنانية من زمان ع أميركا للعمل بالتجارة. ولد ب ٦ كانون التاني ١٩١٤ بولاية ميشيغان لأم وبيّ لبنانية اسمن شارل يعقوب كيروز ومرغريت طوق. 

من صغرو كان عم يحاول يشق طريقو بهالعالم. داني بلش من الصفر، إشتغل كبياع للحلويات لما كان عمرو ١٠ سنين، وكان يبرم شوارع أميركا الفقيرة. ولكن إعتلى المسرح لأول مرة لما كان عمرو ١٥ سنة ومن وقتها بلش مشوارو بالفن. وبالرغم من المعاش القليل اللي كان ياخدو والصعوبات اللي كانت توقف بطريقو، بلشت نجاحاتو وموهبتو بالتمثيل تبرز على مسارح ديترويت.

واليوم يعتبر داني توماس من أبرز النجوم اللي لمعوا ع الشاشة والمسارح الأميركية من الخمسينات لحد التمانينات القرن الماضي.

كان ممثل ومغني وكوميدي ومنتج سينمائي. إتميّز بحضور إستثنائي، وشخصية مميزة ع المسرح، لدرجة كان عندو مسلسله الخاص اسمو “داني شو” اللي انعرض من ١٩٥٣ لحد ١٩٥٧. وكمان شارك بعروض تلفزيونية مع أسماء فنية بارزة متل دين مارتن، شيرلي جونز، بينغ كروسبي، وغيرن.

ومن على فراش الموت، بيوصي بيّو لداني “عندي وصية إتركها إلك قبل الوداع الأخير: ما تنسى الوطن”. وبالفعل، داني ما نسي. وكان عطول يعتلي المسرح بشخصيات لبنانية متل شخصية “أبو خليل” أو شخصية Uncle Tonoose، شوفوا الفيديو هون: 

غير انو عطول كان يدخل اسم لبنان ببرامجو التلفزيونية، متل بحلقة “The Road To Lebanon” سنة ١٩٦٦، شوفوا الفيديو هون:

وأثر داني ما كان كان فني بس، يذكر انو كان مؤسس مستشفى سانت جود لمعالجة سرطان الأطفال سنة ١٩٦٢، وإنشهر كتير بالعمل الخيري اللي أضاف البعد الإنساني لشخصيتو المحبوبة.

داني توماس هو فخر الوطن، الفنان اللبناني والإنسان القدير، مثال على إبداع الشعب اللبناني  حتى بالمهجر، اللي رغم المآسي والصعوبات قدر يوصل ويرفع اسم لبنان بالعالي.

شوفوا كمان، أعلى معبد بالعالم القديم ع قمة جبل الشيخ وقصتو غامضة!