أعلى معبد بالعالم القديم ع قمة جبل الشيخ وقصتو غامضة!

كل معبد من الحقبات التاريخية القديمة بيروي قصة بتعبر عن الحضارات اللي مرقت ع المنطقة، خصوصي بقلب بلد متل لبنان،غني بتاريخو وحضاراتو وآثارو. بس الغريب انو في معبد بلبنان، ومن من أهم المعابد بالشرق القديم وبعالمنا اليوم، قصتو بعدا لليوم مش مكتشفة وكل اللي منعرفوا عنو معلومات من باحثين من زمان. مشو نتعرف مع بعض على قصة معبد قصر عنتر الروماني!

معبد قصر عنتر، أعلى معبد بالعالم القديم موجود بلبنان

قصر عنتر هو معبد روماني تم توثيقه من قبل السير تشارلز وارن سنة ١٨٦٩. وبعدها بال ٢٠٠٣ تم إكتشاف جنبو معبد قصر شبيب. وهالموقع مكون من معبدين رومانيين حجمن زغير، وبعاد بس كم متر عن قمة جبل حرمون (جبل الشيخ). ويذكر انو جبل الشيخ بالعصور القديمة كان عندو أهمية دينية وروحانية. وكان يعتبر ملاذ مقدس بديانات مختلفة، ما كان سبب تسميتو بجبل حرمون (الجذر: حرم يعني المقدس). 

معبد قصر عنتر قاعد على ارتفاع ٢٨١٤ متر ع الحدود بين لبنان وسوريا وهو أعلى معبد بالعالم القديم، ومن الصعب كتير الوصول إلو. بالرغم من انو عمارتو مش واضحة، بس هو منحوت بدقة عالية من الصخر الصلب وبيتميز بالشكل المستطيل. هالمعبد الروماني  قاعد على حجرة بيضاوية الشكل ومن دون سقف، ، وقسم من هيدي الحجرة حالياً موجود بالمتحف البريطاني. 

ولاقى الرحال البريطاني السير تشارلز وون قطعة من حجارة المعبد محفور عليها كتابات يونانية دينية وترجمتها بالعربي: «بأمر من الإله الأعظم المقدس قدموا النذور في هذا المكان». وهيدا عدا عن إكتشاف معابد مختلفة متوزعة ع سفوح جبل الشيخ بيشرف عليها قصر عنتر و قصر شبيب من القمة.

Image retrieved from The British Museum

وفيكن تتعرفوا مع Classical Lebanese بالفيديو هون على التفاصيل الدينية للمعبد أكتر: 

ممكن شي نهار تكفي الأبحاث بالموقع ونعرف معلومات أكتر عن القصر، بس هلق بتبقى قصتو غامضة. خبرونا، كنتوا بتعرفوا انو في هيك جوهرة رومانية بلبنان؟ 

Image retrieved from: موقع بلدية شبعا الرسمي

شوفوا كمان، بلدة قريبة من بيروت بقلولها منبع الفنانين… شو هي يا ترى؟