أكبر معرض للصناعة اللبنانية راجع هالأسبوع بأكتر من 200 مشارك!

من 28 لغاية 31 تشرين الأول، راجع معرض الصناعة اللبنانية LINDEX 2026 بنسختو التانية على واجهة بيروت البحرية، ليجمع أكتر من 200 صناعي ومنتج لبناني من قطاعات مختلفة. من الأكل والمشروبات، ومستحضرات التجميل والأدوية، للأثاث والديكور، والأزياء والأقمشة والمجوهرات، وصولًا للتكنولوجيا والصناعات الميكانيكية والتغليف والصناعات الثقيلة. رح تلاقوا مجموعة كبيرة من المنتجات والشركات اللبنانية.

المعرض بتنظّمو جمعية الصناعيين اللبنانيين، ومتوقّع يستقبل حوالي 10,000 زائر. وبيشكّل فرصة لتتعرّفوا أكتر على المنتجات اللبنانية وتدعموا الصناعة المحلية. وكمان لتكتشفوا شركات ومشاريع جديدة، خاصةً مع مشاركة موزّعين دوليين ووجود فرص للتسويق و التصدير.

على مدى 4 أيام، رح يكون في برنامج متنوّع. يعني ورشات عمل، ونقاشات عن مستقبل الصناعة بلبنان، وتجارب طبخ وتذوّق، وعروض حرفية، وفرص للتواصل بين أصحاب الأعمال. المعرض رح يكون من الساعة 3 بعد الظهر للـ 9 المسا.

شو برنامج معرض الصناعة اللبنانية LINDEX 2026؟

الأربعاء 28 تشرين الأول — الافتتاح

بينطلق المعرض بحفل الافتتاح الرسمي، وبيكون في نقاشات عن ربط الصناعة اللبنانية بالأسواق العالمية والتحوّل الرقمي. كمان، فيكن تشاركوا بورشة لتحضير كريم الجسم، وورشة لتنسيق الستايل، وتحضروا عروض طبخ لايف، وتشاركوا بسحوبات على جوائز.

الخميس 29 تشرين الأول

برنامج الخميس بيشمل نقاشات عن الصناعة الصديقة للبيئة، و التقاعد بلبنان، وفرص الشركات اللبنانية بالأسواق الفرنكوفونية. ورح يكون فيكن كمان تشاركوا بورشة لصناعة الصابون، وتحضروا جلسات عن العناية بالبشرة، وعروض طبخ بتقدّم أطباق لبنانية بلمسة جديدة.

الجمعة 30 تشرين الأول

بهاليوم، رح تنطرح مواضيع بتهمّ القطاع الصناعي، منها إعادة استخدام الموارد، وتخفيف كلفة الطاقة، و التحوّل الرقمي، مع إطلاق بوابة الخدمات الإلكترونية التابعة لوزارة الصناعة. كمان، رح يكون في لقاءات للتواصل بين أصحاب الأعمال، وورشة لتحضير كريم الجسم، وجلسة لقراية وفهم المعلومات الغذائية على المنتجات، وكمان عروض الطبخ لايف.

السبت 31 تشرين الأول

بآخر يوم من المعرض، رح يكون في حفل توزيع جوائز Lebanon Student StarPack للطلاب، ونقاش عن العلاقة بين الجامعات والصناعة اللبنانية. أما إذا بتحبّوا تجارب الجمال، فرح تقدروا تشاركوا بورشة لصناعة العطر، وجلسة عن اختيار ألوان المكياج المناسبة. و رح يكون في ورشات لأطباق تقليدية بلمسة عصرية.

وعلى مدى الأيام الأربعة، رح تتنظّم سحوبات على جوائز ضمن مساحة 3al Mouda Experience. و لتعرفوا تفاصيل كاملة لكل يوم، فيكن تزوروا برنامج المعرض الرسمي.

📍 Seaside Arena، واجهة بيروت البحرية الجديدة
🗓️ 28–31 تشرين الأول 2026
🕒 من 3 بعد الظهر للـ 9 المسا
🎟️ للتسجيل عبر الرابط هون

يعني إذا بتحبّوا تكتشفوا منتجات لبنانية جديدة، تتعرّفوا على شغل صناعيين، أو تشاركوا بورشات وتجارب مختلفة، معرض LINDEX بيجمع كل هالأشيا بمكان واحد وعلى مدى 4 أيام.

شوفوا كمان:

هالسوق عامل مسابقة زيت زيتون وفيكن تشاركوا ببلاش!