حزروا شو؟ في بلدة قريبة من بيروت، ما حدا بيعرف إنو هالبلدة المتواضعة طلع منا أهم الفنانين والشعرا بلبلد، خلونا نعرفكن عليها اليوم.
شو هيي هالبلدة يا ترى؟ عم نحكي عن بلدة كفرشيما لي فيها كل شي وهيي تابعة لقضاء بعبدا، أحد أقضية محافظة جبل لبنان.
كفرشيما باللغة السريانية بتعني “قرية الفضة”، وشيما باللغة اليونانية بتعني “ربة الحكمة”، وفي بعض الروايات الشعبية بتقول إنو كان في ملك عظيم إسمو كفر، فتسمت كفرشيما عإسمو.
لي بميز هالبلدة إنو فيها بعد بعض البيوت التراثية لي بعدها محافظة على تراث الجبل اللبناني على الرغم من ظهور البنى الحديث لي انتشر بالبلدة.
كفرشيما معروفة بزراعة الزيتون والحمضيات، وبعض الأشجار المثمرة متل اللوز والخوخ بالإضافة لبعض الخضرا الساحلية.
بتعرفوا مين أهم الفنانين لي طلعوا من بلدة كفرشيما؟
١. حليم الرومي
والد الفنانة العظيمة ماجدة الرومي. أنتج الكتير من الألحان الموسيقية والغنائية المنوعة، بلغت حوالي ألفين عمل فني مختلف ساهموا بتشكيل هوية الموسيقى اللبنانية.
٢. الست ماجدة
بنت حليم الرومي، قدمت كتير أغاني خالدة، وهي ست الستات بكل معنى الكلمة وسفيرة النوايا الحسنة، من أشهر أعمالها “كل شي عم يخلص”، “اعتزلت الغرام” و”عم احلمك يا حلم يا لبنان”.
٣. عصام رجي
نجم لبناني من الستينيات، سحر جمهورو بصوتو وأغاني الخالدة متل “هزي يا نواعم” و”يا سمرا يا تمر هندى”. انطلق مع الأخوين رحباني ورجع سطع نجمو لحالو وما اكتفى بالغنا بل خاض كمان تجربة التأليف والتمثيل. رحل عن هالدني سنة 2001، لكن بصمتو بقيت معنا وترك ورا إرث فني غني وكبير.
٤. الموسيقار الكبير ملحم بركات:
فنان وملحن وموسيقار لبناني، من أشهر الفنانين والملحنين اللبنانيين، أبدع بلون الطرب بسبب صوتو القوي وشعورو العميق. خلط الموسيقى العربية مع الغربية بشكل مميز، وأتحفنا بأكتر من 200 غنية خالدة منن “بدك مليون سنة” و”على بابي واقف قمرين”. فاز بجوايز كتيرة، بس المرض غلبو بسنة 2016. ملحم بركات أسطورة حية بأغاني اللي بعدنا منغنيها لحد هلق، ما بتموت ولا حبو بقلوبنا بموت!
٥. فليمون وهبي
من أشهر الملحنين اللبنانيين، لحن لفيروز مجموعة من الأغاني المميزة. بلش مع الرحابنة، بس خلق بعدها عالمو السحري مع فيروز وصباح وكتار غيرن، لحن”يا زهرة الجنوب”، “على جسر اللوزية”، “يا طيرة”… هاو نبذة زغيرة عن الأغاني اللي لحنها ولي بتضل عالبال. نال تكريم كتير بحياتو، بس التكريم الحقيقي نحنا لي نلنا من ورا أغاني الحلوة.
٦. سليم وبشارة تقلا
مؤسسين جريدة الأهرام المصرية. هالجريدة واجهت مصاعب بس انتصرت، واتسمت بالموضوعية وحرية الرأي. بعد وفاة سليم عام 1829، تسلم بشارة الأهرام، بس بوقتها واجه صعوبات عديدة بوج بالتيارات الخديوية، العثمانية، الفرنسية، والإنغليزية بس بقيت صامدة رغم كل شي.
كرمال كل هل الفنانين والأصوات المميزة والمبدعة، هالبلدة بتستاهل هل لفتة الزغيرة وأكتر من هيك، نتوقف عند كل شبر فيها ونكرم هالنجوم الكبار لي ترسخوا بذاكرة كل لبناني من الجيل الجديد والقديم.
شوفوا كمان، أول فيديو كليبات لأشهر الفنانين اللبنانيين!