اشيا منحبها
شوفوا أول فيديو كليبات لأشهر الفنانين اللبنانيين!
ببداية التسعينات، صاروا معظم الفنانين يعتمدوا الفيديو كليب لتسويق اغانيهن.
تعو نسترجع سوا بعض أول فيديو كليبات لنجومنا المفضلين:
١. نانسي عجرم، محتاجالك
لون غريب شوي وطربي، وغابت نانسي بعد هالكليب لفترة، بس رجعت بقوة بلوك جديد ولون جديد بأغنية “أخصمك آه” وكسرت الدني ورجعت ظهرت بعدها بفيديوهات منها “يا سلام” و”ياي سحر عيونو” وصارت نجمة الصف الأول.
٢. رامي عياش، بغنيلها وبدقلها
أول غنية صورها رامي كانت “بغنيلها وبدقلها”، وظهر فيها عم بغني وكان شب بأول طلعتو، ومن بعدها صور عدة أغاني ناجحة ومنها “والاه” و”سواد النني”. وهاي عبارة عن فيديو كليب حفلة، يعني مصور خلال حفلة!
٣. عاصي الحلاني، جافتني
من أشهر أغاني التسعينات، تصورت على الطريقة القديمة وبيحمل الفيديو كليب قصة حب بين عاصي وصيبة، بيظهروا فيها بمقتطفات رومانسية.
٤. نوال الزغبي، عايزة الرد
النجمة الدهبية نوال الزغبي من أول الفنانات يلي تصوروا أغانيها على طريقة الفيديو كليب، بلشت مسيرتها الناجحة بعالم الفيديو بأغنية “عايزة الرد” ومن بعدها صورت عدة أغاني حققو نجاحات كاسحة متل “مين حبيبي أنا” مع النجم وائل كفوري و”ماندم عليك”، و”الدلعونا”.
٥. وائل كفوري، بعترفلك
بلش مشوار وائل باستوديو الفن، وصور أول غنية “بعترفلك” على طريقة المخرج سيمون أسمر، بيظهر فيها عم بغني بالاستوديو. بس من أول الكليبات لي تصورت مع قصة حب لوائل كانت “أنا رايح بكرا عالجيش” و”حكاية عاشق”.
٦. راغب علامة، يا ريت فيي خبيها
من أشهر أغاني التسعينات على الإطلاق! لعب الفيديو كليب دور كبير بنجاحها، ظهر راغب فيها عم بغني باستوديو عم يتمايل مع الموسيقى. مين ما بيعرف هالغنية؟ بعدنا لهلق منسمعها ومنرقص عليها بحفلاتنا وسهراتنا.
٧. إليسا، بدي دوب
مين فينا ما بيتذكر البنت الحلوة صاحبة الشعر الأسود لي لافي حالها بالشرشف الأبيض وعم تغني وتتغنج؟ هيدا كان أول فيديو كليب لإليسا، وبداية رحلتها الفنية لي وصلتها للنجومية وحتى العالمية.
٨. ميريام فارس، أنا والشوق
ظهرت ميريام فارس بأول فيديو لإلها بطريقة كتير مهضومة وقريبة من الناس، مين ما بتذكر صاحبة الشعر الكيرلي والضحكة البريقة؟ هالغنية وهالكليب وصلوا ميريام للشهرة وللنجاح الكبير.
٩. هيفاء وهبي، أقول اهواك
عام 1994، خطفت هيفا وهبي الأنظار بجمالها بفيديو كليب “أرضى بالنصيب” لي ظهرت في إلى جانب سلطان الطرب جورج وسوف كعارضة أزياء. وعام 2002، ظهرت هيفا بفيديو “أقول لهواك” وحدثت صخب كبير بلبنان والعالم العربي وكان هالفيديو حدث فني بحد ذاتو.
شو أجمل ذكرياتكن مع هالأغاني؟ شاركونا تعليقاتكن!
شوفوا كمان، بتتذكروا أشهر مسلسل مكسيكي بلبنان: كان بس ينعرض تفضى الطرقات!