تعوا نتذكر أجمل فيديو كليبات من إخراج نادين لبكي.

نادين لبكي نعرفت أكتر شي بإخراج الأفلام اللبنانية يلي شقت طريقها ووصلت للعالمية ومن أشهرها “كاراميل”، “هلق لوين” و “كفرناحوم” وغيرن كتير وبداياتها كانت مع الفيلم الشهير “البوسطة”.

بس مش الكل بيعرف إنو بنت بلدة بعبدات، بلشت مشوارها الفني بإخراج الفيديو كليبات وأبدعت بكل عمل ولي كان يسمع موسيقى بسنين الألفية بيعرف إنو نادين كان إلها دور كبير بنجاح النجمة نانسي عجرم.

لهيك ولأن منحب نادين كتير، حبينا بمناسبة عيد ميلادها ال50 نتذكر أجمل فيديو كليبات بمسيرتها الإخراجية.

١. أخاصمك اه، نانسي عجرم

هالكليب أحدث ضجة فنية بوقت عرضو على الشاشة وكان خطوة ناجحة وذكية نقلت نانسي عجرم لمحل تاني وهيدا اللون بوقتها ميزها عن باقي الفنانين.

٢. ياي سحر عيونو، نانسي عجرم

كلنا منتذكر هالفيديو البسيط والقريب للقلب يلي بيظهر في نبيل عجرم خي نانسي كحبيبها ولي كسر الأرض بوقتها، قدرت نادين تنقل صورة نانسي، البنت الغنوجة والدلوعة والمهضومة بطريقة كتير محترمة ومحترفة.

٣. يا سلام، نانسي عجرم

هالكليب الجريء أظهر جمال نانسي وخلاها توصل لكل بيت لبناني وأدخلها قلب الجمهور المصري لي كان مبسوط بالصوت الحلو والجمال بنفس الوقت. هالكليب أكيد بعدو بذاكرتكن وبعدها صورة نانسي بالبيروك علقانة براسكن والbeat بعدنا منرددو ما بموت.

٤. آه ونص، نانسي عجرم

كمان مرة جديدة أبدعت لبكي إلى جانب نانسي عجرم بفيديو بتظهر في نانسي كفتاة مصرية عايشة الحياة الشعبية المصرية على المزبوط وكانت فكرة الكليب خطوة جنونية وذكية بنفس الوقت صورت فيها لبكي كلمات الغنية بأجمل قصة.

٥. إنت إيه، نانسي عجرم

من أجمل الأغاني لي عملتن نانسي عجرم ولي حكيت وجع كل أنثى تعرضت للخيانة بحياتها من حدا بتحبوا كتير، ولا يمكن هيك وجع يتصور بطريقة حقيقية أكتر من الحقيقة لي نقلتها نادين.

٦. لون عيونك، نانسي عجرم

من الخيانة منروح على الفرح، ما في ولا فيديو كليب صور الفرح ع الطريقة اللبنانية متل هالفيديو، بعدو رمز الحب والرومانسية وأكيد يعتبر من أجمل الفيديوهات لي نعملت بالعالم العربي على الإطلاق.

٧. بحبك موت، يوري مرقدي

كلنا منتذكر قدي هالغنية كانت بوقتها هيت وكان الفيديو هوي من أحد أسباب شهرتها، بيظهر في يوري عم بغني قدام جمهور كبير من الصبايا مع الموسيقى الصاخبة.

٨. اعتزلت الغرام، ماجدة الرومي

هالغنية لي عطت ماجدة الشي لي كانت عم تنبش علي بوقتها وأضافت على مسيرتها إبداع وجمال، ولبكي قدرت بوقتها تنقل صوت ماجدة وتحفة الموسيقار ملحم بركات بأجمل صورة فولكلورية.

٩. يا طبطب، نانسي عجرم

مرة جديدة أبدعت نادين إلى جانب نانسي عجرم حيث أظهرت صورت الفتاة الشقية المغرومة بأهضم قصة.

١٠. في حاجات، نانسي عجرم

هالغنية بتحمل معاني ووجع كبير بتعيشو كل بنت مغرومة بس يكون حبيبها مش عارف يشاركها مشاعرها وحاجاتها وبالفيديو قدرت نادين تظهر الوجع بعيون نانسي من دون ما تحكي.

١١. اطلع فيي، كارول سماحة

من أجمل الأغاني لي كتبها ولحنها المبدع مروان خوري وغنتها كارول بكل شغف وحب. الفيديو نقل صورة البنت الشرقية لي عايشة قصة حب بس مش عم تعرف بقا حبيبها ولا عم تعرف إذا بعدها بقلبو من بعد ما دخل الروتين على علاقتن.

شو كان فيديو كليب الفضل عندكن لنادين؟

شوفوا كمان، أول فيديو كليبات لأشهر الفنانين اللبنانيين!