تعرفوا معنا على أنواع الدبكة اللبنانية!

جزء من تراثنا وحضارتنا ومن الفولكلور اللبناني الأصيل، الدبكة اللبنانية إلها قواعد فريدة. بسنة 1957 صار أول مهرجان للدبكة الشعبية ببعلبك. وهيك بلش هالفن ينتشر أكتر وأكتر بقلب لبنان وبرات لبنان وخصوصي بالمناطق والبلدان المجاورة بلبنان يلي عندها دبكتها الخاصة. وهيك شوي شوي صارت الدبكة تنتشر. 

^{Credits: Al Jarida}

الدبكة رقصة لبنان وهي أنواع، كل وحدة بتحكيلكن حكاية شكل. بحسب موقع عادات وتقاليد أشهر نوع هوي الدلعونة الشمالية يلي منتشرة أكتر شي بالبقاع وجبل لبنان وبعض ضيع الجنوب وبتاخدكن على جو العونة والمساعدة لأن من زمان كانو يدبكوا الجيران على سطوح البيوت بإجرين لما يقبع الطين بس تجي الشتوية ويساعدوا بعض لما تفرط السطوح لأن كانت معمولة من باطون وهيك بلشت الرقصة.

في عنا كمان الهوارة ودبكة الغزيل يلي كل حركاتها حماس وفرح وما في أجمل منا مع روح الدبيكي البقاعية وفي كمان الدبكة البداوية يلي بقولوا بعود أصلها لفرقة بدو من النجد بالسعودية، في كتير غيرهن كمان، كل غنية ولحن عندها خطوات خاصة وحركات مميزة.

^{Credits: Al Sabaah}

ومتل ما اليونان عندن الزوربا والأتراك عندن الدبكة التركية نحنا بلبنان عنا الدلعونة والهوارة يلي هني أكتر شي معروفين ومنتشرين بين مناطق لبنان وأكتر شي منرقص علين بلأعراس، والأعياد والحفلات وعلى المسارح.

بتختلف طرق تأدية الدبكة بحسب الغنية أو اللحن وتستخدم ببعض رقصات الدبكة المسبحة. غير هيك الدبكة عندها أغاني تراثية خاصة متل الميجانا والدلعونة والهوارة وغيرها من الإيقاعات المستخدمة لهالنوع من الرقص.

ومن أشهر قصص الدبكة عبر التاريخ، هني البحارة اللبنانية يلي كانوا على متن سفينة تايتانيك الشهيرة يلي غرقت بسبب تصادمها بالجليد، بوقتها اللبنانيي قرروا يغادروا الحياة هني وعم يرقصوا رقصة لبنان “الدبكة” وبوقتها صاروا حديث الساعة ووصلوا رقصة الدبكة للعالم… حتى هني وعم بموتوا ما قدروا ما ياخدوا لبنان معن.

^{Credits: Arabic Post}

وفي عنا قصة مهضومة عن الدبكة بلبنان، على قد ما منحب الرقص والفرح والبسط منحب الأكل كمان، لهيك سمينا أشهر بسكويت لبناني عنا يلي هوي من صنع غندور على إسم الدبكة وبعدو لليوم موجود بكل بيت لبناني ومناكل منو كل يوم الصبح مع فنجان قهوة وعلى الصبحيات. وصراحة كتير مهضوم بيجي على غلاف البسكويت من برا صورة تنين دبيكي، صبية وشب، أما البسكويت فهوي عبارة عن طبقة بسكويت مخبوزة من برا ومحشية كريما على فانيلا وحامض من جوا.

الرحابنة وفيروز وصباح وكل مين شاركن أعمالن الفنية والفولكلورية وصلوا الدبكة للعالمية وصارت جزء من الهوية اللبنانية يلي لو شو ما صار ما بتتغير ولا بتتبدل. أما اليوم، الدبكة رجعت مرة جديدة طلعت من لبنان وسافرت على العالم كلو مش بس من خلال أعمال فنانين الزمن الجميل من خلال كمان فرق للمحترفين متل فرقة “كركلا” للرقص وفرقة “هياكل بعلبك” يلي هيي الأشهر على الإطلاق، بيرقصوا بالأعراس، والمهرجانات وحتى بشاركوا أشهر الفنانين بحفلاتن.

الدبكة اللبنانية، مش بس إرث، هيي جزء من الهوية اللبنانية اللي بتجمعنا، لازم نحافظ عليها ونعلمها لولادنا وولاد ولادنا، كرمال هالتقليد اللبناني الحلو يضل يفرح الناس وينقل حكاياتنا للأجيال الجاية.

ولنعيش أجواء الدبكة شوي، جبنالكن أشهر أغاني الدبكة يلي منعرفها:

١. دبكة دواره، فيروز

٢. ع العين مولييتين، فارس كرم

٣. الهوارة، ألان مرعب

٤. ميجانا ودلعونا وياغزيل، طوني حنا

٥. يا هويدلك، ألان مرعب

شوفوا كمان، شو أول مطعم إيطالي فتح بلبنان؟