مدونة
ليش بيعملوا مغلي بس يخلق ولد بالبيوت اللبنانية؟
المغلي أكلة تقليدية مميزة بتتحضر للاحتفال بالولاد يلي خلقوا جديد بالبيوت اللبنانية، ورمزية هالحلو غنية ومعانيها عميقة.
من وين إجت هالعادة؟
من زمان كان المغلي يتحضر للاحتفال بس بالصبيان وبعدين صار كمان ينعمل بس تخلق البنت.
المغلي أول أكلة بتتحضر بالبيوت اللبنانية بعد ما الأم تولد، وبيقدموا للأم وللعيلة كلا وللجيران والضيوف.
وكمان المغلي عندو رمزية دينية، بما إنو احتفالات نويل بتتعلق بميلاد المسيح، صار المغلي حلوى احتفالية بفترة كريسماس ببيوت لبنان.
كيف بينعمل المغلي؟
المغلي عبارة عن بودينغ رز لونه بني بسبب البهارات المضافة إلو، بينعمل من الرز الناعم والسكر والمي والكراوية والقرفة الناعمة، وبيتزين بالمكسرات وبرشة جوز الهند. بيحتوي المغلي على القرفة والزنجبيل والهيل ببعض المناطق بلبنان، وأكيد بينرش عليه كمية كبيرة من الصنوبر والزبيب أكتر شي.
مش بس هيك، المغلي عندو فوايد صحية، بيعتقدوا الجيل القديم إنو الكراوية من أهم مكونات المغلي، بتساعد على زيادة إفراز الحليب عند الأم إذا عم بترضع.
شو قصة لون المغلي؟
في أسطورة لبنانية بتقول إنو لونو البني بيرمز للتربة الخصبة، وإنو المكسرات فوقو بتشبه بذور رح تطلع على الحياة متل حكاية الإم والطفل لي خلقان جديد.
ليش إسمو مغلي؟
لأنو لازم يغلي لمدة طويلة من ساعتين لتلات ساعات تقريباً ولازم يضل يتقلب على نار هادية ليستوي مزبوط وبحسب العادات، لازم حدا من قرايبين الإم أو إم البي يحضروا المغلي لأن الإم بتكون تعبانة من الولادة.
مش بس هيك آمنو الأجداد إنو المغلي عندو خصائص طبية بتساعد على الشفا من الوجع فصارو يقدموا للإم بعد الولادة ليخففوا من عزاب الولادة وبعدين صار يتقدم للضيوف كمان.
من العادات كمان إنو بس يجوا الضيوف بقدموا هدية للمولود الجديد، وببعض الأحيان بتكون ليرة دهب بيعطوها للأهل بعد ما ياكلوا كاسة مغلي ومن بعدها بيتمنوا للولد طولة العمر والصحة ودعوات مهضومة.
لقدي بضل يتقدم المغلي؟
بيتقدم المغلي لمدة 40 يوم على ولادة الولد يلي خلقان جديد كجزء من العادات والتقاليد.
المغلي تقليد توارث من جيل لجيل، وصار جزء من عادات وتقاليد البيوت بلبنان بس يخلق ولد جديد وحتى على عيد الميلاد بس يخلق المسيح. فالمرة الجاية لما بتدوقوا المغلي، تذكروا إنو مش بس حلو عادي، إنو هوي قصة، قصة بتحكي عن هوية شعب وتقاليد متوارثة، قصة بتدفي القلب وبتعلقكن بأرضكن وبيتكن وأهلكن.
شوفوا كمان، تعرفوا على أنواع الدبكة اللبنانية.