بيت جعلوك: حكاية معبد روماني منسي بضيعة منجز!

بين عكار وبعلبك، رحلة عبر الزمن!

^{Credits: Akkar Trail درب عكار}

بضيعة منجز، ضيعة رايقة وحلوة كتير بشمال لبنان وتحديداً بقضاء عكار، مخبى معبد روماني قديم معروف باسم “بيت جعلوك”. هالمعبد مش بس موقع تاريخي، هوي حكاية حضارات عابرة، هوي رمز للإلهة نيميسيس، إلهة الانتقام وإلهة القدر، هوي رحلة عبر الزمن من العصر الروماني لليوناني.

من معبد للإلهة نيميسيس ل كنيسة بيزنطية!

^{Credits: Akkar Trail درب عكار}

انبنا “بيت جعلوك” من حجر البازلت الأسود أو الحجر البركاني، هالمادة اللي بتخلي فريد من نوعو بلبنان. أخد إسمو من نيميسيس، إلهة قديمة كان رمزها دولاب منقوش على أحد حجارة المعبد. بعد ما سقطت الإمبراطورية الرومانية، تحول هالمعبد لكنيسة بيزنطية.

^{Credits: Akkar Trail درب عكار}

والغريب بالموضوع إنو تعمر على حجز البازلت الأسود البركاني يلي ما في منو كتير بلبنان وموجود أكتر شي بمنجز والضيع يلي حواليها، البعض بقول إنو سبب وجود هالحجارة بعود لوجود بركان بالزمانات بهالمنطقة واختفى ولهيك أرض عكار أرض خصبة ومين بيعرف يمكن عنجد هيك!

اكتشاف مهمل ونهب خلال الحرب!

^{Credits: Akkar Trail درب عكار}

تم اكتشاف “بيت جعلوك” مش من زمان، بستينيات القرن الماضي، بس للأسف، توقفت أعمال التنقيب خلال فترة الحرب الأهلية اللبنانية، وازدادت أعمال السرقة لحجارتو المنقوشة والتهريب على الحدود. هالشي هدد سلامة هالموقع التاريخي المهم وخلا يفقد البعض من أجزاءو وهالشي كتير بزعل.

معبد فريد من نوعو!

^{Credits: Akkar Trail درب عكار}

بيتألف “بيت جعلوك” من مدخل ومدخل عتيق بوصل لقدس الأقداس بواسطة درج. كان قدس الأقداس بيحتوي تمثال المعبود. وقبل المدخل بتلاقوا صفان من ستة أعمدة وعلى الجنب من الجهتين بوابتان زغار بودوا لدرج بوصل للسطح داخل برج.

^{Credits: Akkar Trail درب عكار}

لي بميز هالمعبد عن غيرو هوي إنو مبني بالحجارة السودا، هالشي ما بتلاقوا بأي معبد روماني أو يوناني تاني بلبنان.

^{Credits: Akkar Trail درب عكار}

حكاية حضارات عابرة!

^{Credits: Akkar Trail درب عكار}

“بيت جعلوك” هو أكثر من مجرد معبد، هوي حكاية حضارات عابرة، هوي رمز للتنوع الثقافي بلبنان. هالمعبد بيحكي قصة الشعوب اللي سكنت لبنان من آلاف السنين، من الرومان لليونانيي والبيزنطيي.

^{Credits: Akkar Trail درب عكار}

كنز منسي بضيعة منجز….

مع الأسف، “بيت جعلوك” ما بيحظى بالاهتمام الكافي، ما حدا بيعرف بوجودو وكتار الناس لي حتى ما بيعرفوا ضيعة منجز الحلوة ومش زايرينها من قبل.

^{Credits: Akkar Trail درب عكار}

منجز ضيعة شمالية موجودة بقضاء عكار بتتميز بآثارها وتاريخها العريق. هالقرية بتضم كنوز من كنوز لبنان، حجر البازلت الأسود لبيوتها التراثية.

“بيت جعلوك” هوي جزء من تراثنا، هوي حكاية ما بدنا ننساها. هالمعبد بحاجة للحماية والاهتمام، لازم نعمل كل شي للحفاظ على هالموقع التاريخي المهم.

شوفوا كمان، أشهر القصور الأثرية بلبنان!