مدونة
شو قصة وادي الجماجم ببسكنتا: وادي الجتت لي ما حدا بيقدر يوصلوا!
سامعين شي عن وادي الجماجم؟ وادي الجماجم موجود ع طريق بتغرين وبسكنتا! هالوادي مش بس حلو، يللي بيخليكن تتنفسوا هوا نضيف وتشوفوا منظر بفرح القلب، بس كمان وادي بيحكي حكاية بطولة عمرها ٧٠٠ سنة!
شو قصة وادي الجماجم؟
بالزمن القديم، سنة ١٢٩٢، صارت معركة كتير كبيرة بين المردة، يلي كانوا ساكنين ببسكنتا والقرى المحيطين، وجيش المماليك. المماليك قاتلوا السكان لياخدوا المنطقة وجربوا سكان القرى الدفاع عن أرضن، بس المماليك انتصروا وقتلوا أكتر من ١٧٠٠٠ زلمي وكبوهن بالوادي.
شو صار بعدين؟
بتقول الروايات الشعبية لأن كتير ناس ماتوا وانكبوا بالوادي، سمو الوادي يلي كان إسمو “وادي اولون” وادي الجماجم لأن صار مليان جماجم قتلى. والوادي ضل مهجور كتير سنين من أهلو، لحد ما رجعت الناس تسكن في بزمن العثمانيين.
شو بميز هالوادي؟
غير إنو بقولوا هالوادي مليان جتت، كمان ما إلو لا بداية ولا نهاية بتحسوا ما بيخلص قد ما عميق! في كتير حكي عن ليش إسمو وادي الجماجم. الرواية التانية بتقول إنو أربع شباب راحوا يستكشفوا الوادي واختفوا بقلب الوادي ضلوا مفقودين وصاروا الناس يقولوا بلعهن الوادي، وبعد سنين لقوا جماجمن بالوادي ومن هيك بوقتها صار إسمو وادي الجماجم.
وادي الجماجم كتير مميز، محاط بجبال كتير حلوة وافي في شجر كتير والمكان منيح كتير للمشي و للتنفس لكل حدا عبالوا يغير جو ويرتاح.
بسكنتا: عروس صنين!
بسكنتا أكتر من بس بلدة جبلية. هي غنية بالطبيعة الخلابة وبالفكر بعد! بلدة الكتاب والشعرا وأهمن مخايل نعيمة.
بقولوا بتلاقوا بقلب الوادي مغارة غريبة عجيبة بقولوا انها بتوصل بين جبلين! في بعض الأهالي بيحكوا عن قصة رجال من القحطانية قدر يوصل على المغارة وفات عليها لحالو من السمحيقة وطلع من العامودية، من الجهة التانية اللي فيها نهر تاني. بقولوا هالمغارة فيها كمان ٦ غرف أبوابها مقنطرة، وقال بالزمانات في ناس كانوا هربانين وساكنين فيها!
بس يلي بيحب الطبيعة كتير رح يعشق بسكنتا!
هالبلدة الجبلية مميزة بطبيعتها الخلابة ومنازلها الحجرية القديمة وبساتين التفاح والكرز والكرمة وفيها آثار من فترات تاريخية مختلفة، من الفينيقيين للرومان. من أهم المكتشفات المقابر القديمة، وعملات معدنية، وفخار، ومعابد، وقصور أمرا المردة.
إذا شي نهار زرتوا بسكنتا، ما تنسوا تشوفوا وتتأملوا وادي الجماجم. هالوادي رح يذكركن بقصة صمود و بطولة الأجداد، و رح تشوفوا جمال الطبيعة اللبنانية.
شوفوا معنا، ٨ محلات ربيعية لازم تزوروها بلبنان!