من أرشيف لبنان النادر: أول صورة التقطت لبيروت

بتعرفوا لبنان عندو تاريخو الخاص مع بداية التصوير بالشرق الأوسط؟ رح نخبركن بهيدا المقال عن أول وأقدم صورة التقطت لبيروت مع نبذة شوي تاريخية وممتعة.

من أرشيف لبنان: أول صورة لبيروت

نشر المؤرخ شارلز حايك على صفحته فيديو بيعرض فيه  “أول صورة التقطت لبيروت”، وبترجع الصورة لسنة ١٨٤٠. 

هالصورة النادرة بتقدم لقطة لبيوت و مباني مدينة بيروت سنة ١٨٤٠. بالخلفية بتلاقوا جبل لبنان، بالوسط مسجد الأمير عساف، بتشوفوا السطوح القديمة، وحتى البعض من الغسيل المعلّق و بتلاحظوا شبابيك مقنطرة. 

مين المصور ورا هالصورة التاريخية؟

سنة ١٩٤٠، زار الرسام والمصور فريديريك غوبيل فيسكيه مع المصور الفرنسي هوراس فيرنيه وابن خيّه تشارلز ماري بوتون بيروت خلال رحلتن للسلطنة العثمانية. أخدو الطريق من مصر للقدس، مروراً ببيروت وعندن لقطات نادرة للمدن بهالعصر. بالرغم من انو نموذج الصورة “الداجيروتايب” ضاع، بس بقي منو نسخة متل الصورة المطبوعة وهيدي اللي تعتبر أول وأقدم صورة لبيروت.

بهالحقبة من الزمن، كانت الداجيرية أول نوع من التصوير الفوتوغرافي المتاح للناس. وكانت هالتقنية المعروفة بال “داجيروتايب” تستعمل ورقة من النحاس المطلي بطبقة رقيقة من الفضة، وكانت دغري تطلع الصورة مفصّلة بدقة من دون استخدام صورة سلبية.

بين الداجيرية وآثار بعلبك الرومانية

من بعد رحلة فيرنيه وفيسكيه للشرق، إجا بعدن المصور جوزيف-فيليبرت جيرولت دي برانجي. وهو واحد من أول مستعملين الكاميرا الداجيرية وانشهر بسبب صوره النادرة للشرق. ومن أبرز أعمالو هي صورة للمعابد الرومانية بمدينة بعلبك.

Source: metmuseum.org photograph collection

وبسبب هالصور الإستثنائية والأولى من نوعها، مدن لبنان صارت جزء من تاريخ تقنية داجيرية و تصوير.

خبرونا، حبيتوا هالنبذة التاريخية عن أول صورة التقطت لبيروت؟

شوفوا كمان، شو قصة أول فيلم بلبنان؟