تيتا هدى، عارضة أزياء لبنانية دخلت عالم الموضة بعمر 80!

موهبة لبنانية دخلت عالم الأزياء عن عمر كبير، أبدعت وقدّمت وأبهرت الجماهير والمهتمين بهالمجال ونحنا حبيّنا نعرّفكن عليها. إذا ما سمعتوا عن هدى زيادة، خلينا نحكيلكن عنها.

هدى زيادة بتعرّف عن حالها قبل كل شي إنها “تيتا”، و هي عارضة أزياء بلشت مسيرتها مش من كتير، اكتشفت حبها للعرض لما طلب منها حفيدها، إريك ماثيو ريتر، انو تشارك معو بجلسة تصوير للماركة تبعو Emergency Room. تأسست هالماركة للي بتتمتع بشعبية كبيرة واللي بتركز على إعادة التدوير بسنة ٢٠١٨، وكانت البداية لمسيرة زيادة بعرض الأزياء لما صار عمرها ٨٠.

تيتا هدى جسّدت تفاني الماركة بالفردية والشمولية من وقت ما بلشت، وجذبت جمهور كبير. ورغم إنها بتقول إنها مش محترفة، بس بلا شك هي موهوبة قدام الكاميرا!

قدر حفيدها يساعد ستّه إنو تطلع من الحزن بعد وفاة جدو، وإنتقلت من ثيابها السود للتياب الجريئة. نظرته الفريدة بالموضة والأزياء كشفت عن الرقي والموهبة الحلوة عند تيتا هدى بهالعالم. و بسرعة صارت جزء مهم من رؤيته الإبداعية.

بمقابلة مع VICE Arabia، هدى بتخبرنا إنه من جوا كانت دايماً حاسة إنها خلقت لتكون عارضة أزياء. كان حلم ما قدرت تحققه لما كانت أصغر. بعد ما تزوجت، ركزت كلياً على عيلتها.

لجانب دورها ب Emergency Room، شاركت بعدة عروض لكتير من الماركات منهم Casablanca، Tony Ward Couture، Salim Azzam. وكمان كانت النجمة بعروض لـMarie Claire Arabia وAlmaza Beer.

هيدي التيتا اللبنانية بتتبنى الشمولية والتنوع من خلال تحدي معايير الجمال بعالم الموضة وعرض الأزياء. ومش غريب انها صارت مصدر إلهام لكتار من الناس.

طيب، حبيتوها قد ما حبيناها؟ تأكدوا إنو تشوفوا حسابها على الإنستغرام لمتابعة كل أخبارها. خبرونا، في أحلى من هيك تيتا؟

من وقت ما بلشت، عم بتمثل ماركة إميجنسي روم، و مؤخراً صمّموا فستان للممثلة العالمية جوليا فوكس، فيكن تقروا كل التفاصيل هون.