قصف أجمل بيت تاريخي بالنبطية، هيك صار!

دمر الاحتلال مبارح أجمل بيت تاريخي بمدينة النبطية، المعروف بدارة سعيد شاهين. 

هالبيت يعتبر جزء من هوية المدينة، بتحمل جدرانه  قصص الأجيال السابقة وتاريخ حافل بالأحداث. يعود بناؤه سنة ١٩٢٨ للنبطاني سعيد شاهين بحي الميدان. بيت تاريخي شهد على كتير من الفترات التاريخية، من حروب وانتصارات، لحد ما تم تسويته بالأرض بغارة معادية من طيران الإحتلال. 

حسب الصحافي كامل جابر، صنّف المعماريين دارة آل شاهين ع إنها بتجمع بين العمارة اللبنانيّة التقليديّة والزركشة الإيطالية. بيخيّم عليها اللون التراثيّ اللبناني تماماً على الجهات الجانبيّة والخلفيّة للدار، من حيث الأبواب والشبابيك والحيطان اللي فوقها القرميد الإيطالي. تم إعادة ترميمو سنة ٢٠١٣ بالحجر الصخر مع الحفاظ على البلاط المزين والملون، ولكن بلحظات تحول لرماد.

هالبيت ما كان بس مكان، موجود بقلب الذاكرة لكل سكان النبطية واحتضن أهلها و تاريخها. واليوم، فقد الجنوب جزء من تراثه الثقافي والشعبي.

قبل فترة، نزل فيديو بيوثّق الدمار الهائل لضيعة يارون اللي صرلها عم تتعرض للقصف من أكتوبر ٢٠٢٣. مشهد عنجد بيبكي! فيكن تشوفوا هون.

الفنون والعمار جزء لا يتجزأ من الهوية الوطنية، وهالشي بيستدعي حماية هيدي المعالم من التدمير. فقدان هالبيت يثير تساؤلات حول كيفية الحفاظ على التراث الثقافي بهيك حرب شرسة، ما تركت لا الحجر والبشر. 

رح نرجع ع ضيعنا ونعمّر بيوتنا حجر حجر!

شوفوا كمان، كلارا، أول طفلة ولدت بمركز نزوح