2000 شجرة زيتون للجنوب… مشروع معاً لزيتون لبنان بلّش!

بعد نجاحاتها الكبيرة بالأردن وفلسطين، وصلت العربية لحماية الطبيعة (APN) على لبنان مع مشروعها الجديد “معاً لزيتون لبنان”. هالمشروع هدفه زرع 2000 شجرة زيتون وإرجاع الحياة للأراضي يلي تضرّرت من عدوان الاحتلال.

المشروع انطلق رسميًّا نهار الجمعة 25 نيسان 2025 من بيروت، بحفل افتتاح بنقابة المهندسين. كان برعاية وزير الزراعة الدكتور نزار هاني، وبالشراكة مع الشبكة العربية للسيادة على الغذاء (ANFS). ومن المهم نذكر إنو المشروع بلّش فعليًا بشباط، بزراعة 200 شجرة زيتون بعدة مزارع بمحافظة النبطية، كبداية لإعادة النهوض بقطاع الزيتون بجنوب لبنان.

من تشرين الأول 2023 لآخر تشرين التاني 2024، تعرّض لبنان لعدوان ممنهج. هالعدوان دمّر أكتر من 12٪ من مزارع الزيتون بجنوب وشرق البلد، وهالمنطقتين بيشكّلوا حوالي 36٪ من الإنتاج الوطني. العدوان سبّب حرايق ضخمة قضت على أكتر من 65 ألف شجرة، وخسائر بملايين الدولارات، وتهجير كتير من المزارعين.

هدف المشروع هو إعادة زرع الكروم اللي تضرّرت، خاصة بالجنوب والبقاع. كمان دعم المزارعين المتأذّين، وحماية تراث الزيتون، وتعزيز السيادة الغذائية بلبنان.

رئيسة APN رزان زعيتر قالت: “بكرا السبت 26 نيسان، رح نزرع 2000 شجرة زيتون بجنوب لبنان، بإيدينا ومن كل قلبنا، بحملة لبنانية-عربية لكل شخص بيحب هالأرض.”

وزير الزراعة صرّح: “عنا فرصة نوقف حد المزارع ونرجّع نحيي الزراعة بكل لبنان، وبدعي كل الجمعيات تنضم لإلنا ع الأرض.”

السبت، كان في احتفال كبير ببلدة قانا جنوب لبنان! جمع المزارعين، عائلاتن، وجمعيات أهلية، بمشاركة بلدية قانا، وفريق APN، والمهندس حسن الجعجع يلي أكّد إنو المشروع هو البداية، ورح يتوسّع ليشمل زراعات تانية بكل لبنان.

لتدعموا مشروع معاً لزيتون لبنان، فيكن تتبرعوا عبر الرابط هون.

شوفوا كمان،فنانين الجنوب رجعو، هالمعرض فتح من جديد بالنبطية!